EKTING Deputi Polis Komisina Operesen, Donald Yamasombi i givim 12-pela nupela polis kar i go long Gavana bilong Oro provins, Gary Juffa long Mande long Boroko Motors long Pot Mosbi.

Ol i baim ol dispela kar aninit long wanpela plen ol i kolim Kina-for-Kina we Polis Komisina David Manning i kamapim long en. Insait long dispela plen, ol provinsal gavman na Royal Papua Niugini Konstabulari (RPNGC) bai bungim mani na baim ol nupela polis kar bilong ol wan wan provins long kantri.

Dispela em namba 2 projek aninit long Kina-for-Kina plen. Namba wan projek aninit long dispela plen em Madang ilektoret.

Long taim bilong givim ol nupela polis kar i go long Oro Gavana, Mista Yamasombi i tok long polis long mekim gut wok bilong en, em i nidim ol tul kain olsem ol polis kar.

Kost bilong ol dispela 12-pela polis kar em K2 milien. Mista Yamasombi i tok tenkyu long Oro Gavana Gary Juffa na Provinsal Lo na Oda Komiti bilong Oro long sapot ol i givim.

“Long baim ol dispela polis kar em wanpela samting tasol long lukautim ol dispela polis kar em i narapela samting olgeta na em i bikpela samting tru. Ol sampela ikwipmen mipela i baim bilong Madang em ol i no bin yusim gut na nau mipela i lukluk i go bek na sekim mipela yet gen long olsem wanem bai mipela i menesim gut ol dispela samting bikos sapos ol dispela samting i no stap bai mipela i no inap long mekim gut wok bilong mipela,” Mista Yamasombi i tok.

Em i strongim Gavana Juffa olsem mani we provins bilong en i putim long baim ol dispela polis kar bai mekim gut wok.

Gavana Juffa i amamas long kisim ol dispela 12-pela nupela polis kar we 10-pela em ol Nissan Patrol na tupela Mitsubishi.

Em i tok tenkyu long RPNGC na i tok dispela i soim divelopmen bilong Oro na i mekim Oro provins i kamap gutpela piksa bilong polis koman long ol arapela provins.

“Mipela i stat wantaim ol dispela polis kar. Bai mipela baim ol arapela ikwipmen olsem yunifom, gan na ol arapela teknikal ikwipmen we ol polis bai nidim long Oro,” Gavana Juffa i tok.

“Mipela i laik kisim i kam bek ol bipo taim bilong RPNGCwe polis fos i gat gutpela disaplin na mipela i save amamas long ol polis fos bilong mipela.”