MADANG Nesenel Kot nau bai harim kot bilong Manus provins stat long dispela yia na go.

Nesenel Kot Jas Jastis Ioya Geita i tokaut long dispela long ol nius lain long Madang.

Jastis Geita i tok tupela Nesenel Kot jas long Madang bai go kam long harim kot bilong Manus provins.

Tupela jas em Jastis Geita yet na Jastis Virgil Narakobi.

Tupela jas nau i tap long Madang bihain long ol i senisim long-taim jas Jastis David Cannings husat i bin stap planti yia long Madang provins tasol nau i go bek na wok long Mosbi.

Manus provins i save gat planti hevi long sait long ol yangpela man i karim ol spak brus i go kam long provins.na kamapim planti hevi long komyuniti.

Long ol arapela nius, polis long Madang provins long las wik operesen bilong polis long Madang distrik i bungim bikpela hevi long sait long lojistik olsem trenspot.

Dispela em bihain long Memba bilong Madang na Jastis Minista, Bryan Kramer i rausim ol kar long han bilong ol polis long Madang bihain long ol i no yusim na lukautim ol gut.

Planti pipel long Madang nau i autim bel hevi olsem ol stil pasin long strit nau i wok long go bikpela ol laikim polis long go raun na mekim wok bilong ol na daunim dispela ol hevi gen.

Komanda bilong Beon Koreksinol Sevis (CS) Haus Kalabus, Andrew Polis i askim pablik na komyuniti long Madang provins long bringim ol lain famili bilong ol kalabus lain husat i ranawe long las mun na bringim ol i go bek long han bilong polis.

Mista Polis i tokaut olsem 48 kalabus lain i bin ranawe long las mun.

Namel long ol dispela lain husat i ranawe em 23 em ol lain husat i wetim kot bilong ol, na arapela 25 i wok long kisim mekimsave bilong ol bhain long kot i painim olsem ol i asua.

Tasol Madang Provinsal Polis Komanda (PPC) Mazuc Rubiang i tokaut olsem namba wan kalabus man husat i ranawe em polis i holimpas long Sagalau ausait long Madang bihain long em i kalap long PMV trak na i laik goaut.

Narapela tupela kalabus lain em polis i bin sutim i dai long Yabob viles.

Tupela i bin dring bia wantaim sampela ol yangpela man long hap na i plen long go kamapim trabel taim ol pablik i harim na i ringim polis we polis i hait  i go na holimpas ol.

Tasol wanpela i traim long kisim gan long polis we polisman i kirap na sutim em i dai.

James G. Kila i raitim