Ol United Nations (UN) i tok nogat long pait i kamap long Kainantu taun long Isten Hailans Provins i no longtaim i go pinis.

“Mipela i tok strong long olgeta lain husat i stap insait long pait long lukluk i go bek na senisim tingting bilong ol long kamapin bel isi,”Residen Kodineta bilong UN, Gianluca Rampolla i tok.

“Planti man i lusim laip pinis long tupela sait wantaim. Sapos pait i go het bai planti moa laip i lus.”

Mipela i luksave olsem dispela pait i kamap bikos ol klen i no wanbel long husat i papa bilong graun we wanpela liklik aluvial main i stap long en. Ol i bin wanbel long givim kompensesen long Mas 13, 2021, tasol wanpela pait i kirap namel long dispela taim na sikispela man long traib bilong Agarabi i lusim laip na haus ples bilong ol traib memba bilong Agarabi i bagarap tu.

Na long Epril 8, 2021, dispela tupela traib bai wanbel long bel isi, tasol wanpela kros bilong narapela as i kamap namel long ol meri long Tapo na Agarabi bipo long taim bilong wanbel long bel isi i kirapim bel bilong dispela tupela traib long pait gen.

Insait long dispela ol pait i kamap, 9-pela bilong Tapo i lusim laip na 10- pela bilong Agarabi tu i lusim laip na planti long tupela traib wantaim i kisim ol bikpela bagarap.

Moa long wan tausen manmeri long Kainantu i lusim ples na i ranawe i go long ol arapela ples o i stap hait bikos long dispela vailens i kamap. Ol haus na gaden i bagarap tu na wanpela ripot i tokaut olsem Kainantu Distrik Haus sik i pas.

“Ol dispela kraim i no save bagarapim ol lain husat i stap insait long dispela hevi tasol, nogat, em i save bagarapim olgeta lain husat i stap insait long dispela komyuniti tu,” Mista Rampolla i tok.

“United Nations i laik long sapotim ol provinsal atoriti na inapim ol namba wan nid bilong ol lain husat i kisim bagarap na mipela i laik strongim ol atoriti tu long holim ol lain husat i gat asua long dispela pait.”

Mista Rampolla i tok ol i laik sekim na luksave long ol nid bilong ol manmeri na pikinini husat i ranawe na hait nau yet tasol ol i no inap long mekim dispela bikos situesen long Kainantu em i hat tumas.

Kainatu Distrik Edministresen i wok long wokbung wantaim ol polis long strongim bel isi tasol i gat tok lukaut tu olsem pait bai kirap gen.