Yunaited Nesen Divelopmen Program (UNDP) i helpim PNG Polis wantaim Australia Federal Polis long lonsim wanpela nupela infomesen menesmen sistem long impruvim wok bilong Famili na Seksuel Vailens Yunit (FSVU) long Pot Mosbi.

Dispela infomesen sistem UNDP residen representetiv Dirk Wagener i bin lonsim long Hilton Hotel na FSVU Dairekta Delilah Sandeka na NCD assisten komanda Laimo Asi i bin stap na witnesim.

Taim ol i lonsim dispela infomesen sistem Mista Wagener i tok dispela sistem bai inap helpim long impruvim na menesim ol keis bilong vailens insait long ol famili.

“Nogat planti toktok bilong vailens long kantri na dispela em i olsem singaut bilong yumi kirap na mekim senis long jenda beis vailens.

“Jenda beis vailens i go antap long taim bilong COVID-19 pandemik long kantri olsem na nau dispela sistem bai inap helpim long adresim olgeta keis we i stap pinis long data,” Wagener i tok.

Em i tok dispela sistem bai rol aut long olgeta FSVU seksen insait long kantri na UNDP i amamas long lukim dispela wok i kamap.

Olgeta infomesen bilong famili i kisim birua bai i stap insait long data sistem na ol polis bai inap adresim dispela isu bilong kantri.

Olgeta fail bai ol i trensfeaim na stoaim onlain na em bai isi long painim na lukim long wanem taim polis i laik.

Mista Asi i amamas tru long nupela sistem na wok bilong UNDP na em i laikim dispela kain sistem i mas stap long olgeta senta bilong kantri long helpim wok bilong polis.

“Dispela sistem em bilong helpim ol polis long painimaut husat famili i painim birua i gat rekot i stap wantaim polis pinis o nogat na tu em inap mekim wok bilong ol kot i kamap isi,” Asi i tok.

“Kamapim infomesen menesmen sistem em i no wok bilong ol polis tasol, em i bilong olgeta ogenaisesen long kantri long kipim rekod bilong ol woka bilong ol tu,” em i tok.

Joseph Dawai i raitim