SIF Ekseketiv Opisa (CEO) bilong Pot Mosbi Jeneral Haus Sik (PMGH), Dokta Paki Molumi i laik olgeta wan wan ilektoret i mas i gat haus sik bilong ol yet.

Em i mekim dispela tok i no long taim i go pinis bihainim askim bilong Wantok Nius long olsem wanem em i bai stretim hevi bilong PMGH long ol helt woka i no inap na i mekim moa wok na i les bikos long hevi bilong COVID-19.

Em i tok, em i nidim planti wokmanmeri nau yet long sotpela taim, tasol long longpela taim, em i laikim wan wan ilektoret husat ol pipel bilong ol i save kam kisim helt sevis long PMGH i mas kamapim haus sik bilong ol yet. Dispela bai helpim PMGH long lukluk long ol arapela bikpela sik na stopim ol manmeri long kantri long i go ovasis na kisim helpim.

“ Mi nidim moa wokmanmeri long sotpela taim, tasol long longpela taim, mipela i mas i gat wanpela distrik haus sik long Mosbi Not Wes we i mas gat 200 bet o kain olsem, mipela i mas i gat narapela haus sik ken long Mosbi Saut, narapela long Mosbi Not Is na narapela haus sik long Sentral Provins. Narapela gutpela haus sik long Galp Provins mas kamap o apim mak bilong helt sevis long haus sik i stap long Galp Provins. Dispela bai daunim stres bilong mipela long PMGH na PMGH bai lukluk long helpim ol bikpela sik na stopim ol pipel long i go ovasis.

“Nau yet mipela i no wok long lukluk long ol bikpela sik na stopim ol pipel long painim helpim i go ovasis bikos mipela i wok long mekim wok bilong ol arapela haus sik bikos ol i no stap,” Dokta Molumi i tok.

“Ol lida i mas mekim disisen nau yet long kamapim ol helt senta long olgeta hap insait long siti bikos ol sikmanmeri long Sentral provins na Galp tu i save kam long PMGH na dispela i save mekim namba i go bikpela na putim presa long ol helt wokmanmeri long PMGH,” Siaman bilong Klinikal Gananens Dokta Michael Dokut.

Rebecca Negere i raitim