PORGERA Main bai i op gen klostu taim wantaim wanpela nupela dil we i givim 51 pesen onasip long Papua Niugini.

Dispela em i namba wan taim tru wanpela maining kampani i wanbel long kain dil.

Las yia Praim Minista James Marape i bin pasim dispela main aninit long bikpela driman bilong gavman bilong en long #KisimBekPNG.

Em i tok em i laikim nupela dil we givim gutpela benefit long pipel bilong Papua Niugini. Nau aninit long dispela nupela dil Barrick bai i holim 49 pesen onasip na PNG gavman 51 pesen.

Bipo PNG gavman i bin holim 5 pesen onasip na Barrick Gold 95 pesen onasip. Ol lenona long dispela spesel maining lis i bin save kisim 2 pesen royalti tasol nau insait long dispela dil ol i apim i go antap long 3 pesen. Nau nupela dil i givim wanpela mak we tupela pati wantaim i win.

Barrick Gold i wanbel long dispela nupela dil na long Fraide las wik Praim Minista Marape na Barrick Gold Mark Bristow i sainim agrimen long gavman haus.

Ol wok long kirapim bek dispela maining operesen bai i stat insait long ol mun i kam.