PAPUA Niuini Difens Fos balus bai kisim bodi bilong Memba bilong Kerema, Richard Mendani i go long Kerema tude.

Wantok Niuspepa i no kisim wanpela toksave stret sapos ol bai planim bodi bilong em long Kanabea, Kaintiba long Galp long tude yet o tumora.

Deputi Spika bilong Palamen, Koni Iguan bai givim bodi i go long Galp Gavana, Chris Haiveta long Kerema.

Long Kerema, Mista Haiveta bai kisim bodi i go long Kanabea na givim long ol kaunsil long go pas long program bilong planim bodi.

Program bilong planim bodi i stap long han bilong ol kaunsila bilong Kanabea.

Tasol long asde ol Memba bilong Palamen, het manmeri bilong ol gavman dipatmen na stetutori bodi na maus manmeri bilong ol arapela kantri i bin soim las rispekt bilong ol na lukim bodi bilong em long “Grand Hall” bilong Palamen Haus.

Bodi i bin stap tupela aua, long 10 klok moning i go inap long 12 klok, na ol i kisim i go bek long “Funeral Home” long Erima.

Ripot bilong dokta i tokaut olsem Mendani i dai long sik coronavirus (COVID-19).

Em i gat 53 krismas long taim em i dai.

Em i tok Mendani i namba wan Memba bilong Palamen long dai long dispela nupela sik, COVID-19.

Mendani i gat digri long ikonomik long Yunivesiti bilong Papua Niugini.

Bihain long dispela em i bin wok wantaim Benk ov Papua Niugini long 1991, PNG Pawa (1992-1996), PNG Invesmen Promosen Atoriti (1997-2002), PNG Fores Atoriti (2003-2007) na Pacific Island Forum, Fiji (2008-2009).

Long 2012 Mendani i resis long Kerema Open na i winim dispela sia.

Long 2017 Jeneral Ileksen, em i resis gen na winim gen dispela sia.

Em i stap Memba bilong dispela sia inap long taim em i dai.