MANMERI i mas save long mining bilong tok independens na stap bilong em, Presiden bilong Atonomus Bogenvil Gavman (ABG), Ishmael Toroama i tok.

Em i tok em i no gutpela ol i tok independens tasol i no save tru long ol salens na ol gutpela samting i stap baksait long em.

Em i mekim dispela tok long taim em i go raun long Sentral Bogenvil long dispela wik.

Presiden Toroama i salensim tu ol manmeri long Sentral Bogenvil long ol i mas go pas long ol wok kamap bilong independens sapos ol i laik Bogenvil i kisim independens.

Em i tok dispela tok pait bilong kisim independens em Francis Ona (Bogenvil rebel lida) na Joseph Kabui (pastaim Bogenvil presiden) i bin go pas long em na olsem i moa gutpela ol pipel bilong Sentral Bogenvil i mas go pas long dispela wok.

Em i tok em yet i redi long wok tasol sapot i mas kam long ol pipel tu long lukim laik bilong ol i karim kaikai.

Long wankain taim, Memba bilong Tonsu Konstituensi na Atoni Jeneral bilong ABG na Minista husat i go pas long wok bilong Bogenvil Independens Redi Misin Implementesen, Ezekiel Masat i tok sindaun bilong Bogenvil i kamap independen i no isi wok.

Em i tok dispela i min i mas gat gut gavanens, manmeri i mas wok didiman na wok bisnis, i mas go long skul na kisim save na pasin bilong manmeri i mas senis.

Em i mekim dispela tok long taim em i bin toktok long ABG delegesen long Tonsu, Petats ailan long Buka Wes Kos.

Em i tokim em i wok bilong wan wan manmeri long senisim tingting na pasin olsem senis i kamap.

Mista Masat i tok gavman i mekim ol awenes wokabaut bihain long 98 pesen manmeri i bin vot long ailan i kisim independens.

Em i tok lo bilong ABG i tok wok ol Bogenvil manmeri i mekim i mas kamap long givim sapot long ailan.

“Taim ABG i askim nesenel gavman na nesenel gavman i tok orait long ailan i kisim independens, yu mas save, yu kisim pinis independens,” Masat i tok.

“Bilong wanem bai yumi tok long independens tasol i go het yet long mekim ol pasin nogut olsem smukim spak brus, mekim hom bru, mekim raskol pasin, bagarapim ol meri na pikinini na bagarapim pablik samting?

“Yu mas senis pastaim bipo long senis i kamap.”

Alex Munme i raitim