GAVMAN i no givim gutpela luksave long turis indastri long dispela taim bilong coronavirus (COVID-19), wanpela senia Stetman i tok.

Sir Peter Barter, pastaim Memba bilong Palamen na Minista long nesenel gavman na nau Menesing Dairekta bilong Melanesian Turis Sevis (MTS) i tok gavman i lus tingting olgeta long dispela indastri long dispela taim.

Em i mekim dispela tok insait long wanpela kibung bilong Madang Travel Indastri Asosesin (MTIA) long las wik.

Em i tok bikos i nogat gutpela sapot, planti ol bisnis olsem ol hotel, loj na ol geshaus i painim hat long mekim mani na wok.

Sir Peter i tok i lukluk moa long givim sapot long ol arapela sekta na i no turis sekta.

Kibung i bin lukluk long stap na wok bilong indastri insait long taim bilong COVID-19.

Ol lain husat i bin stap long dispela miting em ol lain i makim ol gest haus, loj, hotel na risot, edukesen institusen, polis na balus kampani.

Olgeta dispela lain i autim bel wari bilong ol insait long dispela taim we gavman i kamapim lokdaun bikos long COVID-19.

Wanpela bikpela samting ol lain turisim indastri lain i toktok long en em wanem kain rot ol i ken kamapim na nidim gavman sapot long promotim turisim divelopimen long Madang provins.

Sir Peter, husat em lida we i promotim na wok insait long turis planti yia i tokaut olsem gavman i no luksave tumas long turis indastri.

Em i tokaut olsem gavman i lukim olsem turis indastri en wanpela liklik i indastri we i no givim moa helpim long ikonomi bilong kantri.

Sir Peter i tokaut olsem ol i askim nau gavman sapos gavman i ken helpim turis indastri na ol bisnis we i pas wantaim indastri na daunim ol takis long taim bilong COVID-19.

Em i tok dispela rot i wanpela rot gavman i ken givim sapot long indastri.

Dispela miting i pasim toktok long MTIA long kamapim wanpela plen we i lukluk long kamapim nupela logo o mak aninit long het tok ‘Beautiful Madang’.

Sir Peter i tok olsem turis indastri em i wanpela sastenabel indastri we em i ken givim wok long ol pipel, promotim wok bisnis namel long ol pipel na bringim nupela mani bilong ovasis (foreign currency) i kam long PNG.

Em i tok olsem dispela nupela rot o plen we MTIA i toktok long kamapim strong wok long promotim ol pasin tumbuna na kalsa bilong Madang long sait long turis indastri.

Sir Peter i tok olsem nau long dispela taim bilong COVID-19 em taim long olgeta lain long Madang husat i stap insait long hospitaliti na turis indastri long wok bung wantaim na helpim ol yet.

James G. Kila i raitim