BAI no gat Vot i No gat Bilip long gavman taim palamen i kibung gen long neks wik Tunde.

Dispela em bikos aninit long Palamen Stending Oda, no gat kain vot i mas kamap bikos i no gat inap taim long nupela gavman i kamapim ol plen na program bilong em long kamapim ol nupela wok.

Dispela long wanem tu, Epril i wanpela yia bipo long palamen bai pinis long holim ol kibung bilong em long redi long holim narapela nesenel ileksen.

Kantri bai go insait long narapela nesenel ileksen long Julai, 2022.

Long dispela taim tu Oposisen kendidet bilong resis long praim minista, Patrick Pruaitch nau i joinim gavman.

Pruatich i palamenteri lida bilong Nesenel Alaiens pati na i memba bilong Aitape-Lumi.

Pruatich i go joinim gen gavman wantaim ol arapela memba bilong pati husat pastaim long Novemba i bin lusim gavman na i bin go joinim Oposisen.

Ol arapela memba bilong pati husat i go bek long gavman em Memba bilong Kairuku Hiri, Peter Isoaimo na Memba bilong Huon Gulf, Ross Seymour.

Memba bilong Kerema husat i bin wanpela pati memba na i go long Oposisen tasol i dai long las wik.

Planti ol arapela memba husat pastaim i bin stap long Oposisen nau i joinim gavman.

Dispela i lukim ol Memba olsem Gavana bilong Galp na palamenteri lida bilong Kantri pati, Chris Haiveta, palamenteri lida bilong Yunaitet pati na Memba bilong Wapenamanda, Rimbik Pato; na Gavana bilong Manus, Benjamin Charlie.

Ol arapela bikpela toktok we bai kamap long neks wik kibung em sapot bilong Independen Komisin Egens Korapsen (ICAC) lo, kamap bilong coronavirus (COVID-19), ikonomi na stap bilong ol bisnis olsem statim gen bilong Porgera Main na kamap bilong Papua LNG na Wafi Golpu Main.