BIKPELA kampani, Rice Indastries i givim wan handret 10 kilogrem beg rais long Goroka Provinsal Haus sik long Isten Hailans, las wik.

Dispela em i no namba wan taim ol i mekim dispela pasin. Foepela mun i go pinis long mun Janueri long dispela yia, ol i bin givim tenpela 10 kilogrem beg rais i go long Goroka Provinsal Haus Sik. 

Eria Menesa, Vagi Asitore husat i bin kamap na givim dispela ol rais i tok kampani i kamap wantaim dispela tingting long givim i go bek long ol komyuniti, na Goroka Provinsal Haus Sik em i wanpela long ol.

“Olsem wanpela bikpela kampani, Rice Industries em i luksave olsem ol komyuniti i nidim helpim long sait bilong ol kaikai, olsem na em i kamap wantaim dispela tingting long sapotim ol komyuniti wantaim ol rais beg,” Asitore i tok.

Deputi bod siaman bilong Isten Hailans Provinsal Helt Atoriti (EHPHA) Tau Amevo husat i bin kamap long kisim dispela ol rais i tok amamas long Rice Industries long kam wantaim dispela helpim.

“Long dispela taim we mipela i wok long lukim planti man na meri husat i wok long kisim sik COVID-19 na i go slip kirap long aisolesesen senta na ol arapela sikman, meri na pikinini long Goroka haus sik, mipela bai i ken kukim dispela ol rais na givim long ol. Bikpela tenkyu i go long Rice Industries long patna wantaim mipela na bringim dispela ol rais long helpim na sapotim mipela long fidim ol siklain long haus sik,” Amevo i tok.

Rice Industries i givim wankain helpim i go tu long ol tripela arapela bikpela haus sik long ol arapela senta olsem long Pot Mosbi Jeneral Haus Sik long NCD, Angau Memorial Haus Sik long Lae, Morobe Province na Mt. Hagen General Haus Sik long Westen Hailan Provins.

Sape Metta i raitim