TOKTOK na wok bilong kabon kredit i bin kamapim planti paul tingting sampela yia i go pinis, na i no bin kamap long wanpela gutpela mak.

Ol dispela toktok i bin kirapim bel bilong ol papagraun long Papua Niugini na sampela bus  bilong ol i bin go insait long wok bilong kabon kredit.

Planti askim i bin kamap long mani bai i kamap olsem wanem na ol pipel bai i benefit olsem wanem?

Tasol ol saintis i go het long kauntim hamas win i stap long ol bus bilong PNG na hamas mani ol inap mekim sapos ol pipel i no katim daun ol diwai long ol loging operesen.

Ol i toktok tu long wanem ol kabon maket bai i gutpela long PNG i ken tred long en.

Las wik long PNG wanpela email komyunikesen i go i kam namel long ol akedemik, ol saintis na ol arapela long kam bek bilong ol kabon kauboi long kantri bihain long wanpela nius ripot I tokaut long CEPA I sainim agrimen wantaim .

Wanpela nem em i stap ples klia long wok bilong kabon treding em Kevin Conrad bilong Coalition for Rainforest. Mista Conrad i bin makim maus bilong Papua Niugini long toktok long kabon treding long UNFCCC (United Nations Framework Convention on Climate Change) na ol arapela intenesenel toktok bilong kabon treding.

Nau ol kauboi i kam bek na nupela nem dispela email i toktok long en em NIHT.

NIHT Inc. (New Ireland Hardwood Timber Inc.) i mekim bikpela plen kabon treding long Nu Ailan na Is Nu Briten Provins. NIHT em i wanpela kampani bilong Amerika.

NIHT i rejisterim pinis wanpela draipela hap bus long saut sait bilong Nu Ailan Provins. Sais bilong dispela bus em 10,443 ekta.

Wanpela ripot bilong REDD Monitor i tok, ol i no kisim tok orait bilong ol pipel pastaim long ol i makim na banisim dispela hap bus.

NIHT em i wanpela loging kampani tasol nau em i lukim sans bilong mekim mani long kabon long ol diwai na em i senisim bisnis bilong em na larim ol diwai i sanap, REDD Monitor i tok.

Namba wan bung NIHT i holim wantaim ol pipel em wantaim Kamlapar Inkoporetet Lenona Grup long Konoagil.

Long email komyunikesen las wik ol toktok i skelim gen ol projek gavman i bin luksave pinis long en; em April-Salumei long Is Sepik Provins, Suau long Milen Be Provins we gavman i bin endosim olsem ol pailot projek long 2012.

Menesmen bilong dispela tupela projek i bin stap olsem wanpela bikpela samting we i mekim na em i pundaun.

Rosa Koian i raitim