Wanpela yangpela pikinini man husat i laik long holim wanpela loya meri klostu long Nesenel Akaivs long Pot Mosbi i nau stap long han bilong ol polis long Boroko Polis Stesin.

 Dispela yangpela mangi i soim wanpela naip long loya meri, tasol dispela meri i lukim na i ranawe. Dispela i kamap long 5 klok avinun long las wik Fraide na ol sekyuriti gad husat i stap long dispela hap i lukim dispela pasin i kamap na kwiktaim tru ol i ranim dispela mangi, holim em na rausim naip long han bilong en.  Ol i bringim em i go long han bilong ol polis long NCD na nau em i bai bihainim sampela proses long Boroko Polis Stesin.  

Taim loya meri i ranawe long dispela yangpela mangi, em i bin pundaun na i kisim sampela bagarap long lek bilong en. Em i amamas long wokbung bilong ol sekyuriti na polis long ol i holim dispela mangi na karim em i go long polis stesin long lo i ken mekimsave long en.