IS Nu Briten polis i givim tok lukaut long ol man long ol i ken kisim bikpela mekimsave sapos ol i bagarapim laip bilong ol arapela, moa yet long ol meri.

Em i tok ol man i no gat rait long bagarapim laip bilong ol arapela.

Em i mekim dispela tok long taim ripot bilong ol man i bagarapim ol meri i wok long kamap bikpela long provins.

Em i mekim dispela tok tut aim Kokopo polis holim pasim wanpela man bikos em i bagarapim wanpela meri.

Polis ripot i tokaut olsem namel long 23 Desemba, 2020 na 6 Mas, 2021 Jerad Taurata bilong Miokopalpal ples long Duke ov York ailan long Kokopo i bin bagarapim wanpela 11-yia meri tripela taim olgeta.

Is Nu Briten polis sif, Inspekta Joseph Tabali i tok nambawan taim Taurata i bagarapim yangpela meri em taim yangpela meri i wokobaut i go long baim fiul na Taurata i go bihain long em na pulim em i go insait long bus na bagarapim em.

Em i givim em K10 long meri na i tokim em long em i no ken tokaut long pasin em i bin mekim.

Tabali i tok long namba tu, em taim meri i pilai wantaim sampela pikinini we Taurata i singautim em i go na i bagarapim meri long 12 Februeri, 2021.

Tabali i tok Taurata i givim K7 long meri na i tokim em gen long em i no ken tokaut long pasin em i bin mekim.

Tabali i tok long namba tri taim em taim yangpela meri i wokbaut i go long lotu na Taurata i go bihain na pulim em i go insait long bus na bagarapim em.

Taurata i givim meri K5 na i tokim em gen long em i no ken tokaut long pasin em i bin mekim.

Long dispela taim, sampela manmeri i painimaut na i tokim papamama bilong meri na papamama i ripot long polis long dispela hevi.

Tabali i tok Taurata long dispela taim i stap long han bilong ol polis long Kokopo we em bai kamap long ai bilong kot bihain long wik.

Michael Novingu i raitim