LONG Mande 12 Epril, Siaman bilong Spesel Palamenteri Komiti bilong Pablik Sekta Rifom na Sevis Deliveri na Oro Gavana Gary Juffa i tok, em bai askim National Housing Corporation (NHC) long hevi bilong propeti bilong stet na Eviksen bilong NHC tenens long Lae.

“Mi bin kirap nogut long kisim toksave olsem NHC i givim wanpela stet propeti o stet aset long Lae i go long wanpela kampani long bekim wanpela dinau,” em tok.

“Dispela propeti long Kasawari Rot, em i bilong ol wok manmeri bilong gavman, na mi laik save bilong wanem na ol wokmanmeri bilong gavman long NHC i rausim ol long haus bilong ol, long amamasim komesel interes.

“Dispela em i no stretpela rot long lusim ol stet aset i go. Mi laik tu long save sapos kain samting olsem i kamap long ol narapela propeti, na sapos ol narapela wok mammeri bilong gavman i kisim wankain hevi olsem.”

Mista Juffa i tok, em i kisim toksave i kam long Minista bilong Graun na Lae MP John Rosso, olsem dispela dinau NHC laik givim stet propeti i go bilong bekim olsem K1 million. Propeti taitel i go pinis long han bilong ona bilong KC2 Ltd, Mei Lin, long Pot Mosbi.

Long lukautim pablik sekta na ol gavman wokmanmeri, Spesel Palimentri Komiti bai mekim olgeta samting ol i ken mekim na painim aut sapos sampela paul pasin i kamap insait long NHC.

Mista Juffa i tok, “Pablik Sevis haus em wanpela rot long kamapim gutpela wok bilong Pablik sevis na Deliveri bilong ol sevis i long kantri.”

Mista  Juffa i tok, Spesel Palamentri Komiti bai mekim wok painimaut gut long ol dil ol i bin mekim. Dispela bai go wantaim lo bilong hau NHC i wok long salim Stet aset, ol tenda, veluesen bilong propeti we KC2 Ltd i bin winim olsem baiya na we KC2 Ltd na IPA na IRC i sanap.

Juffa i tok olsem dispela em wanpela bikpela hevi na em i no inap lusim inap em i painimaut long as bilong dispela hevi.

 Na long Mande 6 Epril, em namba wan taim bilong ol tenens bilong NHC long Lae long kirapim wanpela Tas Fos Komiti, long lukluk long ol hevi i bungim ol famili husat NHC i rausim ol long haus.

Ol i bung wantaim Mista Rosso na givim petisen bilong ol long givim long Minista bilong Housing, Justin TKatchenko.

Insait long dispela petisen ol i askim NHC long stopim NHC long rausim ol tenens long haus nating na wok painimaut i mas kamap insait long Lae NHC opis pastaim.

Penelope Aimari