OL bikpela apgred i kamap long ol fesiliti bilong Bomana Koreksenel Institusen (BCI) i apim strong bilong Koreksenel Sevis long menesim na lukautim gut ol kalabus namel long COVID-19 pandemik.

Ol kalabus husat i no pilim gut long COVID-19 i nau ken stap long hait ples longwe long ol arapela kalabus. Dispela i ken kamap bikos las wik Fraide ol i opim sampela fesiliti long BCI.

Ol i kamapim wanpela ples bilong stap em yet we i gat 49 bet na wanpela tes kompaun long lukautim ol kalabus manmeri husat i no pilim gut. Dispela kompaun i gat 15 bet.

Dispela em i wanpela bilong ol sapot i kam long Australia long sapotim PNG long rispon long COVID-19. Gavman bilong Australia i givim mani mak bilong K1.17 milien long kamapim dispela projek.

Minista bilong Koreksenel Sevis, Win Bakri Daki i tok taim ol manmeri long kalabus i paspas long wanpela hap i mekim haus kalabus i kamap ples bilong kisim COVID-19.

Em i tok taim planti ol institusen i wok long toktok planti long daunim namba bilong ol manmeri i pas pas long wanpela hap, Koreksenel Sevis i opim narapela Yunit we ol i sik i ken stap ol yet na testing kompaun. Dispela em i bikpela samting tru long menesim na lukautim ol kalabus husat i gat COVID-19 na ol saspek keis.

“Mipela i givim mipela yet long daunim COVID-19 long ol haus kalabus insait long kantri. Mipela i gat wokmak long kea long helt na gutpela bilong ol kalabus manmeri bilong mipela, ol Koreksenel Sevis Opisa na ol famili bilong ol tu,” Minista Daki i tok.

“Ol dispela fesiliti bai go long longpela rot tru long helpim mipela inapim wokmak bilong mipela long lukautim ol kalabus manmeri husat i gat COVID-19 na putim ol longwe long ol arapela kalabus manmeri.”

Hai Komisina bilong Australia long Papua Niugini Jon Philp i tok Gavman bilong Australia i givim em yet long mekim olgeta samting em inap long mekim long helpim PNG daunim COVID-19 pandemik.

“Ol dispela fesiliti em ol i kam aninit long bikpela helpim bilong Australia long sapotim rispon bilong PNG long pandemik we i ken sevim laip bilong ol pipel.”