PRAIM Minista James Marape i tokaut dispela wik olsem gavman i redi nau long sainim agrimen wantaim Barrick Gold long opim bek Porgera Gol Main long Enga Provins.

Dispela disisen i kam 12-pela mun bihain long em i pasim dispela main long mun Epril las yia.

Praim Minista Marape i no bin givim nupela lis agrimen long Barrick Gold bihain long agrimen bilong ol i pinis las yia. Em i bin laikim nupela dil bihainim bikpela astingting bilong gavman bilong em long #KisimBekPNG.

Em i tok nau long dispela nupela agrimen Papua Niugini bai i kisim gutpela dil moa long dispela i bin stap pastaim. Barrick Gold i bin wok 31 yia stat long 1989 i kam long 2021 long Porgera na kantri na pipel i no benefit gut aninit long dispela dil.

Nau em i tok bihainim ol prinsipel bilong gavman bilong em, em i laikim kantri i mas kisim moa long ol netserel envairomen bilong em.

“Nau mipela i stap long gutpela mak long sainim agrimen long kamapim nupela Porgera bihain long olgeta wok nigosiesen i kamap pinis,” Mista Marape i tok.

“Mi ken tok olsem dispela em i gutpela dil tru we ol papagraun na Enga Provinsel Gavman bai i kisim moa benefit na balens bilong ol ikwiti we Kumul Minerals bai i lukautim na dispela i min olsem yumi PNG i holim bikpela hap ikwiti bilong dispela projek.

“Ol arapela benefit em long kisim moa long ol takis pastaim long wok i stat na i no gat samting i pas long en olsem ol arapela projek long PNG,” Mista Marape i tok.

Insait long dispela agrimen ol i wanbel tu long apim ol royalti na tu long lukautim gut envairomen na menesim gut ol risetelmen bilong ol pipel.

“Mi laikim dispela ol samting i mas stret pastaim long main i ken op gen na mi amamas long tokaut olsem klostu nau bai mipela i sainim agrimen,” Mista Marape I tok.

Bihain long gavman i pasim Porgera Main las yia, Barrick Gold i bin kotim gavman na dispela i bin surukim taim bilong opim bek main.

“Mipela i luksave olsem dispela ol kot keis i ken kisim planti yia olsem na mipela i mas kamap wantaim wanpela gutpela disisen bilong kirapim wok gen long main,” Mista Marape i tok.

Taim em i pasim Porgera Main Praim Minista Marape i bin sanap antap long bikpela tingting bilong #KisimBekPNG. Em i tok insait long ol toktok wantaim Barrick Gold ol i no lus tingting long dispela bikpela tingting na ol i kamapim wanbel wantaim kampani.