MANMERI i gat wok bilong lukautim ol pablik samting em gavman i putim, Gavana bilong Nu Ailan, Sir Julius Chan i tok.

Em i tok em i no gutpela long ol manmeri i stap nating na i no lukuatim dispela dispela ol samting.

Em i mekim dispela tok long taim Nu Ailan Provinsal Gavman i opim nupela Mul bris long Matalai lokal level gavman eria long Namatanai distrik long las mun.

Em i tok ol pablik samting olsem klasrum bilong skul, ol haus tisa, ol haus sik, bris na ol arapela pablik samting em gavman i kamapim i bilong givim sevis long ol manmeri.

“Mi save planti ol manmeri em ol gutpela manmeri,” Sir Julius i tok.

“Tasol insait long dispela ol manmeri, wan wan man i ting em ol ain man na i traim bagarapim ol samting.

“Taim gavman i kamapim dispela ol samting, em bilong givim sevis long yu long yupela i gat gutpela sindaun.”

Provinsal Woks Dipatmen aninit long Nu Ailan Provinsal Gavman i wokim bris long mani mak bilong K791,000.

Dispela wok i kamap bihain long NIPG i kamapim ol arapela wok olsem haus sik na skul.

Matalai LLG i spesel long Sir Julius bikos mama bilong Sir Julius i bilong Tinkoris na em ples we famili haus bilong gavana i stap long em.

Sir Julius i go wantaim ol memba bilong Provinsal Ekseketiv Kaunsil long opim dispela bris.

Provinsal Wok Menesa, Solomon Pela na Provinsal Helt edvaisa Dokta Joachim Taulo i bin go tu long dispela bung.