Yunivesiti bilong Teknoloji long Lae i pas inap tupela wik. Yunivesiti edministresen i pasim ol geit bilong yunivesiti na saspendim ol klas bihain long tupelo sinia ekedemik (tisa) i dai long wiken. Tupela wantaim long Mekenikel Dipatmen i dai wanpela de bihainim narapela bihain long tupela i soim ol sain bilong COVID-19.

Em i no klia hamas pipel long Unitech i dai pinis long dispela sik.

Yunivesiti edministresen bai i senisim gen skedul bilong en long skul long semesta 2. Nau long sotpela taim bihain long indai bilong tupela tisa bilong ol, ol i pasim skul inap tupela wik.

Tupela ekedmik em Het bilong Mekenikel Dipatmen Profesa John Pumwa husat i dai long Sarere 3 Epril na long Sande 4 Epril narapela ekedmik tu long Mekenikel dipatmen Mista Karo Komuna i dai.

Tupela wantaim i bin sotwin pastaim long tupela i dai.

Insait long tupela wik lokdaun yunivesiti bai i karimaut ol mesa bilong stopim COVID-19 long kalap na go bikpela long kempus.

Nau olgeta wokmanmeri long yunivesiti na ol famili bilong ol na ol sumatin long Taraka kempus i mas werim mask olgeta taim long ol pablik ples, mas stap longwe long narapela na mas yusim ol han senitaisa. Ol geit bai i pas na ol sekyuriti bai i larim ol lain i gat ol ID kad tasol long go insait.

Yunivesiti i putim ol wara tep na ples bilong wasim han na ol han senitaisa pinis na nau em bai i apim wok bilong em long was long dispela sik. Em bai i lukluk na givim sampela moa mesa long ol de i kam.

Em i apil tu long olgeta wokmanmeri na ol famili bilong ol na ol sumatin long bihainim ol mesa long daunim COVID-19.