WANPELA yangpela meri Grace Wop i amamas tru olsem em i bin kisim trening long lukautim gut ol liklik pikinini namel long krismas 3 na 10.

Pikinini Watch PNG, wanpela non-gavman ogenaisesen we i save lukluk long kamapim gutpela ples bilong ol pikinini i bin holim wanpela sikispela wik trening long positiv parenting o gutpela we bilong lukautim pikinini, i no long taim i go pinis. Grace Wop em i wanpela bilong ol 10-pela lain husat i bin pinisim trening na i greduet.

Em i tok em i amamas tru bikos wantaim dispela save em i ken lukautim gut tupela liklik brata na susa bilong en husat i gat 7 na faivpela krismas na tu dispela i ken helpim em long redi long bihain taim em i pinisim skul na i redi long kamapim famili bilong en yet.   

“Mi amamas tru na mi kisim planti blesing long stap insait long ol dispela trening. Em i sans bilong mi long kisim kain trening olsem. Dispela trening bai helpim mi long laip bilong mi nau na bihain tu,” Grace Wop i tok.

Grace em i gat 21 krismas na em i save skul long Youth With A Mission (YWAM) long Lae Morobe Provins. Em i kam stap long Pot Mosbi long holide wantaim ol famili bilong en. Na long dispela holide taim bilong en, em i save helpim mama na papa bilong en long lukautim ol brata susa bilong em long haus.

Em i tok em i bihainim mama bilong en na i go kisim trening bikos mama bilong en i tokim em olsem dispela trening em i ken helpim em long lukautim gut tupela liklik brata na susa bilong en na tupela i ken kamap gutpela man na meri long bihain na tu gutpela sitisen bilong kantri.

Holide bilong en i no lus nating, em i yusim dispela taim long kisim gutpela save long helpim em yet na ol arapela. 

Rebecca Negere i raitim