ISTEN Hailens Provins i lusim tupela lida bilong ol long bipo dispela wik.

Aita Ivarato na Malcolm Smith ‘Kela’ tupela gavana bilong Isten Hailans bipo i dai long dispela wik.

Mista Ivarato em bilong Okapa long Isten Hailans Provins. Em i bin stap gavana bilong provins long 1995 inap 1997.

Mista Smith Kela em i stap long Goroka longpela taim tru. Planti pipel i save long em olsem Smith Kela. Em i papa bilong Pacific Helicopter.

Mista Smith ‘Kela’ i bin stap gavana inap 10-pela yia stat long 2002 inap 2012.

Em i bin karim tu planti arapela komyuniti sevis wok; olsem siaman bilong Goroka Haus Sik Bod na sapotim ol wok bilong lukautim envairomen na ol arapela.

Mama i bin karim em long Inglen tasol em i bikpela long Australia.

Yangpela taim bilong em Mista Smith Kela i bin joinim Australia Difens Fos na pait long Vietnam na ol i bin luksave long em i seivim sampela laip long taim bilong woa na givim em planti bilas long dispela wok. Bihain em i kam long PNG long kirapim wanpela helikopta kampani na em i stap olgeta long PNG.

Em i dai 5-pela de bipo long 79 betde bilong em.

Gavana bilong Sentral Provins husat i papa long wanpela helikopta kampani tu, Robert Agarobe i sori tru long harim dispela nius.

Mista Agarobe i tok Mista Smith Kela em i wanpela hatpela man long wok wantaim, wanpela trupela pailot bilong helipkopta na em i gat stori bilong em yet.

Indai bilong Mista Smith Kela em i wanpela bikpela lus tu bilong eviesen indastri long PNG.