OL ASPLES manmeri husat ples bilong ol i stap long Mosbi Not Wes long Nesenel Kapital Distrik i bruk long makim wanpela man ol yet long Mosbi Not Wes sia.

Ol i tok ol i sapotim tingting bilong makim wanpela lokal man long sanap tasol i no amamas long ol kendidet husat i sanap nau long resis long Mosbi Not Wes bai-ileksen.

Wanpela asples man, Heni Meaia i tok planti ol asples kendidet husat i sanap nau i no putim wari na laik bilong ol manmeri tru long lewa bilong ol.

Em i tok dispela em i no stret.

Em i strongpela sapota bilong Russel Wavik husat i save resis long Mosbi Not Wes long ol pastaim ileksen tasol Wavik i no resis long dispela bai-ileksen.

Long wankain taim, PNG ekting Ilektoral Komisina, Simon Sinai i tok poling o de bilong vot bilong Mosbi Not Wes bai-ileksen bai kamap namel long Me 15-29.

Stat long Mas 18 na i go long 15 Me, em ol kendidet i kempen.

Inap long 42 kendidet i resis long dispela ileksen.

Namel long ol kendidet em sampela biknem manmeri olsem pastaim Sif Jastis Sir Arnold Amet, Seketeri bilong Komyuniti Divelopmen, Yut na Relijen Anna Kavana Bais na pastaim Seketeri bilong Fainens, Thaddeus Kambane.

Ol arapela man husat i resis tu em pastaim rana-ap bilong Mosbi Not Wes ileksen Lohia Boe Samuel na pasto Joseph Tonde.

I gat 112 poling tim i redi long holim ileksen.

Sinai i tok Mosbi Not Wes i pablik opis na distrik i mas i gat Memba i stap long makim ol pipel long palamen bihain long dai bilong Sir Mekere Morauta.

Em i tok 2022 Jeneral Ileksen bai kamap long Julai na de bilong Komisin i no ken holim narapela ileksen em wanpela yia pas.

Dispela de we ol ileksen i mas pas em long Julai.

Sinai i tok em wok bilong opis bilong em long lukim olsem ol manmeri i gat memba i makim ol long palamen.