OL MANMERI bilong Kandep long Enga provins bai liklik taim i save long memba tru bilong ol.

Dispela em bihain long PNG Ilektoral Komisin (EC) i pinisim ol wok bilong kaunim gen vot long Kundiawa, Simbu Provins long las wik.

Wok bilong kaunim gen ol vot i kamap bihain long pastaim memba bilong Kandep, Don Polye i kisim nau Memba Alfred Manaseh i go long Kot-bilong-Dispiutet Riten olsem wok bilong kaun pastaim long ol vot bilong ol kendidet i resis long Kandep Open sia long 2017 Jeneral Ileksen i no bin kamap gut na i no bin stret.

Bikos long dispela Kot i givim oda long kaun i mas kamap gen.

Dispela wok i pinis bihain long ol pasin bilong pulim taitim taim bilong pinisim wok bilong kaunim i bin kamap planti taim.

Las mun Nesenel Kot i givim oda long PNGEC i mas pinisim wok bilong kaunim ol vot long 31 Mas na givim ripot i go long Kot long em i ken tokaut long ol risalt.

Pastaim Kot oda i bin tok long kaun i mas pinis long 26 Februeri tasol dispela i no bin kamap.

Dispela em bikos Kandep Memba, Alfred Manasseh i bin kisim Slip rul aplikesen long kaun i no ken kamap na i pulim taim bilong kaun.

Wok bilong kaun i bin kamap long Kundiawa long Simbu Provins long wanem PNGEC i laikim namel ples moa long kaun i kamap long Enga Provins.

Dispela em bikos em i laik lukim nogat kros pait na bel hevi i kamap long taim bilong kaun.

Ekting Ilektoral Komisina Simon Sinai i tok opis i kisim K5 milien long gavman long pinisim dispela wok.

Sinai i tok i bin gat gutpela sekyuriti long lukautim ol balot pepa long taim kaun i kamap na long ol pepa i bin stap long Kundiawa Polis Stesin.

Em i tok tenkyu long Hailans Rijonal Polis Komanda, Joseph Tondop na ol opisa bilong em long kamapim gutpela sekyuriti.

Reveren Tom Sine bilong Ilektoral Opis long Simbu i bin go pas olsem Ritening Opisa na Westen Hailans Ileksen Menesa Philip Telape na Simbu Ileksen Menesa Antonia Nilkare i  bin stap olsem ol asisten ileksen ritening opisa.

Pinis…