OL pipel long Unitech Telikom rot i ken amamas nau wok long rot bilong ol i pinis na Memba bilong Lae, John Rosso na Nesenel Woks Minista, Michael Nali i opim long las wik long 1 Epril, 2021.

Taim ol i opim rot Mista Rosso na Mista Nali i givim strongpela tok  long ol pipel bilong Lae lo lukautim nupela dispela rot na ol bas stop we nau ol i opim.

Dispela nupela rot, Independens Draivi i stat long University of Technology geit na i go pinis long Telekom mausrot, Tent Siti.

Wok long dispela rot i bin stat long 2017 aninit long O'Neil Gavman na Marape Gavman i karim dispela wok i go pinisim na ol i opim tude.

Lae MP John Rosso i tok, ol pipel i mas lukautim kain ol divelopmen olsem i kamap long ples ol.

Mista Rosso i tok olsem dispela wok em risal bilong ol takis ol i save baim long en.

Mista Nali tu i tok, “Taim yumi lukim kain ol nupela infastraksa kamap, yumi mas lukautim na yumi mas lusim pasin bilong kaikai buai na spetim nupela rot.”

Dispela rot i bin stap bagarap moa long 20 yia olgeta na kamap bilong dispela nupela rot i kisim bikpela amamas i kam long ol pipel husat i save yusim em.

Long dispela taim ol pipel i askim tu sapos Mista Rosso i tingting long putim strit lait tu?

Mista Rosso i bekim olsem bai i nogat strit lait.

Em i tok olsem ol pipel i no lukautim ol strit lait long ol arapela strit we ol i bin putim pinis long ol aarapela rot long Lae olsem na dispela rot bai i nogat strit lait.

“I luk olsem ol pipel i no laikim dispel kain divelopmen olsem na mi no inap putim moa strit lait,” Mista Rosso i tok.

Em i tok amamas tu long Gavana bilong Morobe Ginson Saonu long givim 20 pesen bilong ol takis (GST) mani long wokim dispela rot.

Long dispela taim tu Rosso i tok wok bilong stretim ol rot long Is Taraka sabeb na ol arapela hap long ilektoret bilong em bai i go het yet.

Penelope Aimari- Lae