Em i gutpela samting tru long mi long wok wantaim Wantok Niuspepa long 10-pela wik. Mi bin lainim planti samting taim mi wok olsem treni long ogenaisesen.

Ol dispela wok bilong raun painim nius, kisim piksa na ol arapela wok mi bin mekim i nais tru. Em i namba wan ekspiriens bilong mi tu long wok wantaim wanpela ogenaisesen. Mi bin bungim planti ol bikmanmeri taim mi wok wantaim Wantok Niuspepa.

Wanpela bikpela samting mi lainim em long rait long Tok Pisin. Long namba wan taim, taim mi stat long rait, mi bin painim hat tru long tanim ol stori long Tok Inglis i go long Tok Pisin tasol bihain long sampela taim i kam i go mi bin lainim long rait long Tok Pisin.

Long dispela taim, planti manmeri na pikinini i save toktok long Tok Pisin tasol long rait long Tok Pisin em i hat, olgeta i save painim hat tru long rait long Tok Pisin. Long tanim tok long Tok Inglis i go long Tok Pisin em bai yu mas brukim het long mekim dispela wok. Insait long dispela mi bin lainim sampela toktok long Tok Pisin we mi no bin save long en bipo.

Olgeta wokmanmeri long Wantok Niuspepa i gutpela na nais. Gutpela pasin bilong ol long mi i mekim kain sumatin olsem mi long lainim samting gut insait long wok. Mipela i no save wok aninit long presa tumas bikos Wantok Niuspepa i save kam aut long wan wan wik na i no long wan wan de.

Mi lainim ol arapela samting tu olsem long toktok long telefon wantaim ol profesenel lain, salim email i go long ol bikmanmeri, stap insait long ol bung bilong midia, na i go raun na toktok wantaim ol pipel. Olgeta dispela samting em ol nupela samting long mi. Na mi bin amamas tru taim mi mekim ol dispela samting.

Wanpela samting we i bin kamap long mi long namba wan de bilong mi em Edita bilong mi tokim mi long i go harim wanela bung bilong ol midia long Internal Revenue Comission (IRC). Em i namba wan de bilong mi long wok olsem treni na bilong wanem tru na Edita i tokim mi long i go long ples we mi no gat save long en, mi kisim tingting olsem.

Long dispela ekspiriens tasol na mi luksave olsem long wok olsem ripota, yu bai i go long ol ples we yu no save long en we sampela taim em ol ples nogut, na bai yu toktok wantaim ol pipel we yu no gat save long ol tu na mekim ol samting we yu no save mekim bipo.

Mi yet  mi wanpela treni bilong Wantok Niuspepa, tasol sapos mi laik statim wok bilong mi olsem Jenelis bihain long mi pinisim skul mi gat laik long wok gen wantaim Wantok Niuspepa bikos mi laik helpim ol manmeri na pikinini long ol rurel komyuniti husat i no inap long rit long Tok Inglis.

Mi bin i gat gutpela taim tru taim mi wok wantaim Wantok Niuspepa long Tok Pisin.

Samantha Solomon, UPNG Jenelis Sumatin i raitim