OL Kraim Investigesen Ditektiv (CID) Homisaid Ditektiv long Nesenel Kepital Distrik (NCD) Koman i sasim wanpela Polisman bilong Haiwe Patrol long Sentral Provins aninit long Kriminol Kod long kilim man i dai nating long nogat as long en.

Ol i arestim em na sasim em long las wik bihain long wanpela birua i bin kamap long Mas 26, 2021 long Gaire, ples ausait long Pot Mosbi. Nau em i stap long kalabus na i wetim taim bilong sanap long kot long dispela wik.

Divisenel Komanda bilong NCD na Sentral Provins na Asisten Komisina bilong Polis Anthony Wagambie Junior i tok em  i soim bikpela laik bilong en long dispela keis long bringim jastis long ol famili bilong Billy Iru long Ginigolo na Tourubada na tu ol komyuniti long Gaire long Magi Haiwe.

Asisten Komisina Wagambie i tok dispela birua we polisman i sutim Billy long gan bai no inap tru long kamap sapos i no gat wanpela gutpela as.

“Ol polis i no stap antap long lo. Sapos taim ol polis i stap long bikpela mak nogut long taim ol i karimaut wok bilong ol orait ol i ken yusim gan. Mi tok gen, sapos ol i stap long bikpela mak nogut tasol ol i ken yusim gan,” Asisten Komisina Wagambie i tok.

Ol Homisaid Ditektiv na ol opisa bilong ples birua i kamap i givim sas long dispela polisman bihain long ol i go long eria we hevi i kamap long en na toktok wantaim ol ai witnes.

“Mi tok tenkyu long ol lida na komyuniti husat i stap long Gaire Maket na i larim mi na Deputi Komanda NCD/Sentral Ekting Sif Suprintenden Laimo Asi long i go na toktok long ol wanpela de bihain long hevi i kamap.

“Ples i bin hat tru tasol bihain long ol komyuniti memba i stap isi na i larim mipela long toktok, mipela i stori long ol long rot bilong mekim wokpainim na strongim ol olsem mipela bai no inap long pasim ol eksen we bai kamap bihainim wokpainim,” Mista Wagambie i tok.

Em i tok moa olsem, “Mi laik strongim komyuniti olsem wanem samting i kamap em i kamap antap long eksen bilong wanpela polisman tasol. Ol polis long Sentral Provins bai go het long mekim wok bilong ol long sevim ol pipel.”