Kolisen ov Palamenterien long Pinisim Jenda Beis Vailens (GBV) i sori tru long ol vailens egensim ol meri i kamap bikpela tru long kantri.

Dispela kolisen i kamap long Ogas 24, 2020 we 20 memba bilong Palamen i stap insait long dispela grup.

Siaman bilong Kolisen na Gavana bilong Nesenel Kepital Distrik (NCD) Powes Parkop i tok em i klia tru olsem vailens i go bikpela tru.

“Mipela i singaut long pablik long stop. Inap long atekim ol dispela meri long kantri bilong yumi,” Gavana Parkop i tok.

“Yumi bai strongim ol yangpela meri long kantri long kisim konfiden, sanap strong, na kisim gutpela tingting olsem wanem sapos yumi rausim ol long mekimsave long ol long wanpela asua tasol ol i mekim,” Siaman bilong Spesel Palamenteri Komiti bilong GBV na memba bilong Alotau, Charles Abel i askim.

Mista Abel na Gavana Parkop i mekim dispela ol toktok bihainim tripela kain vailens i kamap long foapela meri i no longtaim i go pinis.

Ol pablik long sosel midia i bin bagarapim Mis Lucy Maino husat i holim taitel bilong Mis PNG bihain long wanpela vidio bilong em pablik i salim i go i kam long sosel midia i soim olsem em i danis. Ol dispela pait toktok egeinsim em long sosel midia i mekim Miss Pacific Island Pagen (MPIP) i rausim em long wokmak bilong en olsem Mis PNG.

Kolisen bilong pinisim GBV i no wanbel tru long pasin ol manmeri husat i bagarapim, atekim, givim sem na daunim Mis Lucy Maino, pikinini meri bilong PNG long eksen bilong danis em i mekim long en.  

“Mi guria tru long lukim ol nogut toktok i kam long ol manmeri husat i gat save. Ol i atekim mi tu taim mi laik strongim Lucy,” Gavana bilong Is Sepik, Allan Bird i tok.

Kolisen i no wanbel tu long wanpela sekyuriti kampani husat i kalabusim wanpela yangpela meri na givim skin pen long en bihain long ol i lukim em i stilim klos long wanpela seken han stoa.

“Ol sekyuriti gad i no gat rait long bagarapim o givim skinpen long wanpela man maski sapos ol i lukim ol i mekim raskol pasin,” Gavana bilong Oro, Garry Juffa i tok.

Kolisen i no wanbel tu long Nesenel Gavman long larim ol soseri riletet vailens i kamap long kantri. Ol i tok i no longtaim i go pinis ol sampela famili long Isten Hailans i sutim tok long wanpela mama na pikinini meri bilong en long sanguma na givim skin pen long tupela wantaim ol hatpela aiyen, brukim tupela han bilong mama na givim sampela bagarap long het bilong pikinini meri. 

Rebecca Negere i raitim