OL Polis nau long Nesenel Kepital Distrik na olgeta hap long kantri i strongim ol nupela mesa i kam long opis bilong Kontrola bilong COVID-19 Nesenel Pandemik, David Manning.

Bihainim bikpela namba bilong COVID-19 keis na dai i kamap long kantri, Praim Minista James Marape i tokaut long aisolesn streteji bilong kantri long Mas 22, 2021 long daunim namba bilong COVID-19 keis. Aninit long dispela streteji ol pipel mas stap long wanpela hap tasol na i no ken muv i go i kam nating nating long narapela haus, ples, komyuniti, distrik na provins na ol i mas werim pes mask olgeta taim.

Wantaim dispela tingting, Kontrola Manning i givim 13-Nupela Mesa long pablik long Mas 22, 2021 long bihainim inap em yet i rausim o pandemik i pinis. Lukim ol dispela mesa long pes 13, 14, 15, na 16 bilong dispela niuspepa.

Wokmak i nau stap long han bilong Polis long mekim awenes na karimaut na strongim dispela ol mesa. Dispela wik em namba tu wik nau ol polis long NCD i strongim ol dispela mesa aninit long aisolesen streteji bilong Praim Minista Marape.

Anthony Wagambie Junior, Divisenel Komanda bilong NCD/Sentral provins na Asisten Komisina i tok em i amamas olsem ol Militeri Polis long Papua Niugini Difens Fos i wokbung wantaim ol long strongim ol mesa long ol pablik ples.

“Mipela ol polis i kisim planti skul pinis long namba wan ekspiriens bilong mipela long las yia taim kantri i go insait long stet ov imejensei na wokmak i bin stap long han bilong mipela long strongim ol lo bilong pandemik. Dispela i mekim na planti paul samting mipela mekim na kamapim belhat namel long ol komyuniti na mipela yet. Tasol nau long dispela aislosen streteji, mi toksave pinis long Metropoliten Suprintenden bilong NCD olsem mipela i no ken mekim ol pasin mipela i mekim bipo. Ol pipel bilong mipela i kisim planti bagarap pinis.

“Tasol mipela i mas i go het na strongim ol pandemik mesa gavman i givim,” Mista Wagambie i tok.

Em i tok long strongim ol pandemik mesa, em i wok bilong gavman, we olgeta ejensi bilong gavman i mas wokbung wantaim na karimaut awenes na strongim pablik long wanem we ol inap long mekim.

“Kain olsem long strongim pasin bilong werim mask insait long PMV na teksi, polis tasol i no inap long mekim. Em i nidim helpim bilong Rot Trefik Atoriti long helpim long sekim ol PMV na teksi,” em i tok.

Mista Wagambie i tok long operesen bilong NCD, wanpela tim bai wok wantaim NCDC, ol Militeri, NCDC Resvis na RTA na strongim ol mesa long NCD.

“Olgeta arapela polis opisa bai go het long mekim wok bilong ol long wan wan polis stesin na eria bilong ol olsem nomol ol i save mekim long en. Bikos kraim na pasin raskol i no save stop. Ol kriminal ektiviti i go bikpela tru bikos long COVID-19,” Mista Wagambie i tok.

Rebecca Negere i raitim