LONG dispela taim nogut we sik COVID-19 i go bikpela long Papua Niugini na i kilim pinis moa long 50 pipel, pasin nogut bilong paulim mani bilong pablik long rispon long COVID-19 i go bikpela tu na i daunim strong bilong kantri long daunim sik COVID-19. 

Ekseketiv Dairekta bilong Institut ov Nesenel Afeas, Paul Barker i laik gavman i mas yusim gut mani bilong pablik long dispela taim nogut.

“Ol pablik i tingting planti na wari long COVID-19 long dispela taim na tu em i taim we ol helt woka i wok hat tru na i les, ol i wok long putim laip bilong ol long mak nogut long lukautim kantri. Olsem na em i bikpela samting long yusim gut ol mani bilong pablik na tu ol arapela mani we i kam long ol divelopmen patna.

“Odita Jeneral i mas yusim pawa bilong en long kwiktaim sekim ol asua i kamap long pablik mani,” Paul Barker i tok. 

Em i singaut long odita jeneral na Independen Enti-Korapsen Komisin (ICAC) long mekim wokpainim long sampela mani bilong COVID-19 rispon ol Helt Dipatmen i givim long wanpela ketaring sevis.

Kopi bilong wanpela sek i kamap long ol jenelis i soim Helt Dipatmen i spendim moa long K600, 000 long wanpela ketaring kampani ol i kolim Caring Ltd, long kukim na saplaim kaikai long ol wokmanmeri long Rita Flyn Netbal kot we aisolesen wod bilong COVID-19 i stap long en.

Long sek namba 226432 Helt Dipatmen i bin peim K114, 140 long ol kaikai ol i sevim long Rita Flynn long Disemba 20, 2020.

 Ol ripot i tok dispela aisolesen senta i bin op long mun Epril 2020 bihain tasol long kantri i tokaut long namba wan COVID-19 keis. Tasol em i no bin operet fultaim.

Rita Flynn aisolesen fesiliti i gat 76 bet tasol planti taim las yia em i no bin bisi. Dispela infomesen i kamaut long taim Praim Minista James Marape i singaut long ol provinsal helt atoriti long givim ol mani ripot bilong ol.

Ripot i tokaut olsem wanpela sinia wokmeri long Nesenel Dipatmen bilong Helt, Agnes Pawiong em i dairekta na seaholda bilong Caring Ltd na em i save wok olsem menesa bilong plening, polisi, na ikonomik long dipatmen bilong helt.

Dispela i mekim Praim Minista James Marape singaut long wanpela ful wokpainimaut i kamap long kontrak bilong dispela kampani na ol proses bilong tenda we i bin kamap long makim dispela kampani.  

 Helt Minista i tok em i nogat wanpela save long dispela samting i kamap tasol em i tok em i bai givim oda long Helt Seketeri Dokta Osbourn Liko long givim ful ripot bilong dispela asua.

Kontrola bilong COVID-19 Nesenel Pandemik Rispon, David Manning i tok ol i no mekim wanpela baset bilong ketaring long Rita Flynn tasol dispela wokmak i bin stap long han bilong Pot Mosbi Jeneral Haus sik.

Rebecca Negere i raitim