PRAIM Minista James Marape na sampela arapela memba bilong palamen i kisim namba wan sut bilong AstraZeneca long Tunde dispela wik long opim wok bilong veksin program bilong COVID-19 long Papua Niugini.

Dadi Toka Junior Siaman bilong Motu Koita Asembli tu i kisim dispela banis sut.

Mista Toka Junior i tok em i joinim Praim Minista James Marape long opim COVID-19 veksin program long PNG.

Asde Trinde ol helt woka na ol arapela franlain woka i stat kisim dispela banis sut tu.

Las wik Australia i bin givim 8,000 AstraZeneca Veksin we gavman i yusim nau long PNG. Narapela 1.5 milien AstraZeneca veksin bai i kam klostu taim na ol jenerel populesen i ken kisim sapos ol i laik.

Mista Toka Junior i tok gavman i no pusim ol pipel long kisim dispela veksin tasol em i askim ol pipel bilong em long Motu-Koita na kantri tu long kisim dispela sans em i stap nau long banisim ol yet, ol famili bilong ol na komyuniti bilong ol long COVID-19.

Em i tok i no gat man o meri i pusim em long kisim dispela sut. Em yet i laik kisim banis sut.

Rosa Koian i raitim