SPIKA bilong Bogenvil haus bilong Palamen, Simon Pentanu, husat COVID-19 tes bilong em i positiv i givim strongpela tok lukaut long ol pipel insait long kantri long harim tok na bihainim ol lo na oda bilong COVID-19.

Wantaim moa long 5, 000 keis long PNG, Pentanu em wanpela bilong ol. Olsem na em i askim olgeta pipel long kantri long harim tok na bihainim ol COVID-19 mesa na tu kisim edvais bilong ol medikol saiens ekspet.

“COVID-19 i no giaman. Em i no  save makim ples o wanem kain skin kala em i laikim. COVID-19 em i kamap na i stap long PNG na Bogenvil tu.

Em i tok moa olsem em i samting we yumi i no inap tok nogat long en.

“Yumi kisim tok lukaut pinis olsem COVID-19 bai bringim bikpela hevi long kantri bilong yumi. Tok pait i go i kam long evidens na stetistik i no inap mekim dispela sik i pinis”.

Mista Pentanu i tok kik bek bilong COVID-19 bai givim yu bikpela pen na bodi bilong yu bai wik. Olsem na em i askim strong ol pipel long putim yau long nius o ol toksave bilong COVID-19 i kam long ol save manmeri o ekspet na serim wantaim ol arapela husat i no gat ekses long ol dispela toksave.

“COVID-19 i no muv em yet, nogat. Em ol pipel i karim na spredim,” em i tok.

Em i tok long paitim dispela sik, ol pipel i mas bihainim edvais bilong ol ekspet na helt atoriti na prektisim pesenel haijin olgeta de.

Simon Pentanu i holim posisen bilong Bogenvil Spika stat long yia 2015 i kam inap nau. Bipo em i Sif Ombudsmen na wok olsem Nesenel Palamen klak long 20 yia i olgeta.