LIDA bilong Spesel Palamen Komiti long Jenda Bes Vailens Charles Abel i tokaut olsem em i no amamas Miss Pacific Islands Pageant Miss PNG Committee (MPIP PNG) i rausim Mis Lucy Maino husat i holim taitel bilong Mis PNG.

Mista Abel i tok i gat planti salens long dispela taim long PNG tasol em i mas tokaut long pasin MPIP PNG i mekim long Mis Maino i no stret.

“Mak bilong kros na sosel midia buli bihain long Mis Maino i postim wanpela vidio bilong em i danis i no nid long kamap,” Mista Abel i tok.

“I tru i gat ol standet we mipela mas holim antap tasol long wankain taim mipela mas sapotim, growim na stiaim ol dispela i stap long was bilong mipela. Hau bai mipela i strongim ol yangpela meri bilong mipela long sanap strong, i no pret na krietiv sapos mipela i kandaim ol long wanpela liklik asua na tromoi ol i go autsait?

“Olsem wanem sapos yumi olgeta i mekim wankain pasin long ol pikinini meri bilong yumi?

“Long PNG yumi gat ol meri i kisim bikpela bagarap olgeta de. I no longtaim i go pinis wanpela meri i dai long Pot MosbiJenerel Haus Sik taim em i laik helpim em yet na kisim win (oxygen). Tude wanpela meri i kisim kanda na ol papa bilong stoa i semim em long wanem em i stilim sampela seken han klos,” Mista Abel i tok.

Em i tok moa olsem i gutpela yumi lukluk gut long ol isu bilong mipela na skelim.

Rosa Koian i raitim