SIF Inspekta Tony ‘Oe’ Sevese bilong ples Lelefiru long Malalaua distrik long Galp provins em i wanpela long 21 olpela polis opisa bilong Isten Hailans husat i bin ritaia long mun Februeri long dispela yia.

Dispela ol polis opisa i kam yet long Kainantu distrik, Henganofi, Daulo na Goroka distrik yet.

Long makim dispela ritaiamen de, lokol MP na memba bilong Goroka AiyeTambua i kamapim opisal pered seremoni we i lukim dispela ol olpela polis opisa i riataia wantaim gutpela kala.

Papa bilong Tambua, Sinia Saiden Dick Tambua tu em i wanpela long dispela ol polis opisa husat i bin ritaia.

Long ritaiamen pered seremoni, lokal MP Tambua i tok, em i amamas long lukim olsem papa bilong em Dick na ol arapela polis opisa i ritaia bihain long ol i mekim bikpela wok bilong lo na oda long sevim ol pipel bilong Isten Hailans.

“Olsem pikinini bilong wanpela polis opisa, mi gro ap na luksave long wanem kain wok em ol polis opisa i save mekim, bikos papa bilong mi Dick em i wanpela bilong ol polis opisa husat i bin wok hat tru long sevim ol pipel bilong Goroka na Isten Hailans moa long 40 yia”, Tambua i tok.

Em i tok bikos long dispela bikpela hatwok dispela ol polis opisa i mekim, planti senis long sait bilong lo na oda insait long provins i kamap.

Tambua i tok amamas long ol i kamapim gutpela wok na kamapim tu planti senis bilong lo na oda long Goroka na Isten Hailans wantaim.

Gavana bilong Isten Hailans Peter Numu husat i bin kamap tu long dispela seremoni i tok amamas tu long dispela 21 polis opisa husat i bin sevim ol pipel bilong Isten Hailans.

“Mi salutim yupela long gutpela wok yupela i mekim pinis long ol pipol bilong provins, na mi ken amamas tu long lukim yupela i go aut wantaim gutpela mak em yupela i kisim long kamapim gutpela wok bilong ol pipel”, Numu i tok.

Sape Metta.