KATOLIK Daiosis long Milen Be i sori tru na I no amamas tru long vailens I kamap long Alotau las wik Fraide 19 Mas, 2021.

Wanpela pater, man Filipins i wok long kamap orait gen nau long haus sik long Alotau bihain long ol raskol i paitim em no gut tru.

Dispela pater wantaim 7-pela arapela pater i kisim bikpela bagarap taim 12-pela raskol i brukim John Sinou Haus we ol 11-pela pris na wanpela diken i stap long en long 2 klok moning na go insait.

Ol I paitim ol pris na stilim ol leptop, mobail fon na kes mani, tupela autbot moto, ol sola panel, projekta na TV.

Bisop Rolando Santos CM bilong Alotau i tok dispela hevi i bin kamap namel long taim ol raskol, samting olsem 50 olgeta i bin pait wantaim ol polis.

Em i tok moa long wanpela wik pastaim long dispela hevi i kamap ol i kisim ripot olsem polis i bin sutim na kilim indai namba tu bilong Tommy Baker. Bihain ol tim bilong Tommy Baker i ogenais gen na pait bek long ol polis. Ol i bin gat planti gan tru.

Wanpela grup bilong Tommy i bin stat sut long ol polis long oval, narapela klostu long Paia Stesin na namba tri grup i go insait long John Sinou Haus na yusim dispela taim long stil na bagarapim ol pris.

Planti pris i bin stap long dispela haus long dispela nait bihain long ol i pinisim wanpela kibung bilong ol na selebretim Krisim Misa.

Ol pater bilong mipela i stap wantaim pret na wari taim ol i tingim yet wanem samting i kamap long ol tasol Holi Wik i wok long kamap nau na ol i pilim ol i mas karimaut pastoral wok bilong ol. Dispela i min ol i mas go bek long ol peris bilong ol.

Ol pipel bilong Alotau i sori tru na wankain taim ol i kros long wanem samting i kamap long ol pris. Ol i no amamas tu long brukdaun i kamap long lo na oda long Alotau na provins olgeta.

Memba bilong Alotau Open Charles Abel i go lukim ol pris bihain long hevi i kamap tasol nogat wanpela gutpela tok i kam long em. Provinsel Edministresen long Alotau tu i no mekim wanpela tok yet long dispela hevi. Namba bilong ol polis i liklik na ol i no inap long namba bilong raskal na tu ol raskal i gat moa gan long ol polis.

Ol Katolik Profesenel Alotau Sapta i sori na tok, “Ol pris i nogat gan na ol i no stap long kamapim vailens. Ol I stap long helpim ol pipel.”

Ol i tok moa olsem i gat nid long gavman i mas toktok wantaim grup bilong Tommy Baker, ol sios na ol pipel long wanem rot ol inap bringim bel isi na oda long Alotau.  Ol i mas stretim ol hevi wantaim gutpela pasin bilong bel isi.

Dispela em i no namba wan tai mol raskol i bagarapim ol pris. Long Ogas las yia sios i bin toktok long lusim Sideia peris bihain long planti raskol pasin i kamap long peris na ol misineri long hap.

Rosa Koian i raitim