PRESIDEN bilong Katolik Bisop Konprens bilong PNG na Solomon Ailan Asbisop Anton Bal i tok, taim yumi selebretim Holi Wik bilong Pen, Dai na Kirap Bek bilong Jisas yumi mas tingim tu ol famili husat i pilim pen na hevi long dispela taim bikos long COVID-19.

Asbisop Bal i tok dispela sik i stap nau long olgeta hap bilong PNG. COVID-19 i luk olsem em i no bikpela sik tasol em i man nogut stret i laik bagarapim ol lapun na ol lain i gat ol arapela sik pinis.

“Yumi tingim tu ol helt woka bilong yumi. Yumi nogat gutpela na strongpela helt sistem na ol helt woka i ken sotwin tru sapos planti sikmanmeri na pikinini i go long haus sik wantaim sik COVID-19 long kisim helpim.

“Yumi soim pasin bilong sapot na laikim long wanpela na narapela olsem ol gutpela Kristen long dispela taim nogut bilong COVID-19. Long dispela taim tu yumi tingim olsem yumi gat wok long lukautim ol arapela pipel tu, Asbisop Bal I tok.

Em i singautim olgeta man, meri, pikinini na ol yangpela long pilim risponsibel long lukautim helt bilong ol yet na ol arapela tu na harim tok na wok bung wantaim ol atoriti long bihainim ol sefti mesa ol i givim yumi pinis.

Na tu tingim sapos veksin em i kam long yumi, yumi no ken pret long kisim. Nau ol franlain helt woka bai i kisim pastaim.

Pop Francis i sapotim veksin program long wol na long wankain taim em i rispektim fridom bilong ol pipel long kisim veksin o no ken kisim veksin.

Asbisop Bal i tok tenkyu tru long Australia gavman na pipel bilong en long sapotim yumi olgeta taim na long kain taim olsem bilong hevi.

Asbisop Bal i tok tu olsem ol i strongim ol pipel long kisim stretpela infomesen na toktok na no ken mekim politik long ol infomesen.

Rosa Koian i raitim