MODILON Haus Sik long Madang i bringim daun ol helt sevis operesen bilong en bihain long ol wokmanmeri bilong haus sik i kisim sik COVID-19.

Sif Ekseketiv Opisa (CEO) bilong Madang Provinsal Helt Atoriti, Fidelis Waipma i tokaut olsem bikpela namba bilong ol medikol wok lain long Modilon Haus Sik husat i kisim sik em ol lain I wok long akauns seksen, na ol i pret dispela i ken kalap i go long ol arapela medikol wok lain long haus sik husat i no kisim COVID-19 olsem na ol i go stap long aisolesen long haus bilong ol yet.

Deputi Rispons tim lida long Madang, Dokta Martin Daimen i tok olsem stat long mun Janueri ol i bin rekotim 27 COVID-19 keis long Madang tasol dispela namba i surik i go antap tru insait long sotpela taim tasol. Tude namba i stap moa long 70 positiv keis long Madang.

Dokta Daimen i tokaut olsem  em i salim ol lain i gat COVID-19 i go stap long aisolesen long haus bilong ol yet. Dispela i min olsem ol i mas stap ol yet na longwe long ol arapela lain na helpim ol yet wantaim stim-waswas na kisim marasin long lukautim bodi bilong ol.

Em i tokaut tu olsem stat long dispela yia ol i bin karimaut tes long moa long 1,100 lain, olsem na tude ol i gat 26 tes kit tasol i stap, na dispela em i wanpela bikpela hevi tru nau long Madang long sait long painimaut husat i gat COVID-19.

Wantok Niuspepa i luksave olsem planti manmeri long Madang taun na ol rurel ples i no bihainim tumas dispela nupela aisolesen strateji i kam long Nesenel COVID-19 Pandemik Kontrola, David Manning.

Long las wik Mande, polis i putim rotblok long toksave long ol manmeri na pikinini long werim mask na go kam long taun. Tasol bihain long dispela, nogat moa kain wok i kamap, na ol manmeri i no bisi long werim mask na wokabaut. Ol stoa tasol long taun i putim notis na sekyuriti long dua bilong stoa i toksave long ol manmeri long werim mask taim ol i go kam insait long stoa.

Narapela samting tu em ol PMV trak na bas long Madang i no strongim pasin bilong werim mask o yusim ol sop wara marasin long wasim han bilong ol pasindia i go antap long kar. Moa long en tu ol i karim moa pasindia na i no bihainim lo aninit long COVID-19 mesa.

James G. Kila