PABLIK insait long Nesenal Kapital Distrik mas bihainim ol oda na mesa bilong COVID-19 i kam long opis bilong kontrola bilong Nesenel Pandemik David Manning long dispela taim bilong pandemik.

Stat long taim bilong lokdaun i kam inap nau ol skul, pablik ples bilong bung, ol ples bilong lotu, pablik trenspot, maket ples na planti arapela hap we gavman i makim hamas namba bilong ol manmeri tasol i ken yusim o i go i kam long en.

Wanpela opisa bilong Pacific Corporate Security (PCS) Andrew Kamuri i toktok wantaim Wantok Niuspepa long wok bilong ol long helpim long karimaut COVID-19 mesa na oda long ol pablik trenspot long hap bilong kisim pasindia na insait tu long wan wan PMV kar.

“Mipela PCS kisim tok orait long opis bilong Pandemik kontrola long karim aut COVID-19 mesa long pablik trenspot na long ol bas stop insait long Pot Mosbi,” Mista Kamuri i tok.

“Ol pablik i mas putim pes mask na sindaun insait long PMV bas na ol bas i mas karim 15 pasindia tasol. Na tu mipela i helpim long lukautim ol bas stop long sefti bilong ol pipel  na helpim long daunim ol  stil pasin i save kamap,” em i tok.

Em i tok ol dispela wok helpim i bilong gutpela bilong olgeta wan wan manmeri na pikinini na bilong stopim spred bilong COVID-19 long ol pablik ples olsem ol bas stop na pablik trenspot.

Kingsley Tabing i raitim