NU Ailan Gavana Sir Julius Chan i givim oda pinis long Lo na Oda Komiti long Kavieng long go het na mekim wok bilong rausim raskol pasin long provins yusim Vagrancy Act 2011.

Dispela oda em bilong olgeta pipel husat i stap long Nu Ailan Provins.

Gavana Chan i tok, “Taim yu stap long Nu Ailan, yu wanpela Nu Ailan man o meri tu. I nogat nid long yu bihainim pasin bilong rijonilisim long wanem dispela pasin tu i save kamapim sampela moa hevi na i save brukim ol pipel.”

Ol pipel husat polis i painim na rausim i go bek long ples bilong ol bai i no inap kisim ol sabsidi bilong gavman na ol arapela helpim gavman i save givim olsem fri edukesen, pensen bilong ol lapun na ol arapela helpim.

Em i givim oda pinis long Lo na Oda Komiti long kamap wantaim ol rul bilong wok long statim dispela operesen hariap tasol.

“Bai yumi tanim olgeta ston na painim olgeta lain i save mekim kriminel pasin long Nu Ailan,” Gavana Chan i tok.

Gavana Chan i mekim disisen bihain long em i kisim tupela de long bung wantaim Provinsal Police Komanda, Polis Mobail Skwad Lida, Ol mausmanmeri bilong Bisnis Komyuniti, Ol lida bilong ol komyuniti husat i stap long hevi bilong raskol pasin, Nu Ailan Edministresen, Lo na Oda Komiti na Memba bilong Namatanai Open Walter Schnaubelt.

Em i givim oda olsem ol polis bai i go het na rausim raskol pasin long Nu Ailan na i no inap diskrimentim husat i kam long wanem ples.

“Mipela i stap long bikpela pait nau wantaim ol raskol na mipela i no inap larim pasin raskol i bagarapim mipela. Maski ol i bilong Nu Ailan o bilong arapela ples na stap long Nu Ailan dispela operesen bai i sekim olgeta,” Gavana Chan i tok.

Em i singaut long ol pipel bilong Nu Ailan long holim han wantaim na helpim long klinim Nu Ailan. Yumi mas sapotim wok bilong Mobail Polis.