WANPELA papagraun grup long Jiwaka i amamas long nesenel gavman i wokim haus kalabus long graun bilong ol.

Philip Simp, prinsipol papagraun bilong 93.4 eka long Kisic viles, 7.5 kilomita not bilong Banz taun i amamas olsem Koreksenel Sevis (CS) Komisina Stephen Pokanis i wanbel long proposol bilong em.

Mista Simp wantaim ol Awalka hausman bilong em we i papa long graun i tok tenkyu long ol tripela komanda bilong Baisu, Bihute na Mukurumanda haus kalabus long kam lukim Kisic graun pinis na i wanbel long gavman i ken wokim haus kalabus long hap.

Mista Simp i tokim Wantok Niuspepa olsem long Oktoba las yia, em i bungim Mista Pokanis long opis bilong em long Pot Mosbi na Komisina i amamas long proposol bilong em.

"Ol narapela sinia ekseketiv opisa bilong CS opis long Pot Mosbi tu i wanbel long Kisic i ken kamap ples we haus kalabus bilong Jiwaka i ken kamap.

"Mipela i laikim olsem ol lokol memba bilong mipela long Jiwaka mas stap baksait na sapotim mipela long dispela wok.

"Gavana Dokta William Tongamp, Not Wagi MP Dokta Fabian Pok, Jimi MP Wake Goi na Anglimp Saut Wagi MP Joe Kuli mas sapotim mipela," Mista Simp i tok.

Em i tokaut moa olsem sampela ol narapela graun tu i bin kamap long ajenda bilong haus kalabus tasol ol i gat hevi long papagraun we planti papagraun i wok resis.

"Long Kisic, mipela i nogat hevi bilong graun bikos i nogat planti papagraun. Wanpela man tasol i bosim graun na em mi yet.

"Ples em i stap long gutpela eria stret bilong wokim haus kalabus. Em i stap aninit long maunten na namel long tupela bikpela wara na i hat tru long ol kalabus lain i brukim na kam aut."

Ol Awalka hausman i klia olsem planti taim komplen i save kam olsem ol haus kalabus long Baisu na Barawagi i save pulap bikos ol save kisim ol kalabus bilong Jiwaka.

"Nesenel gavman i save pinis olsem i gat nid bilong Jiwaka i mas gat haus kalabus bilong em yet na mipela i redi pinis.

"Samting we i holim bek mipela em nogat sapot bilong ol lokal atoriti bilong mipela long provins na tripela distrik.

"Komisina na ol sinia opisa i laik lukim sapot bilong lokal atoriti bipo long ol i ken kam insait.

"Mipela i singaut long ol mas stap baksait na sapotim dispela wok bilong mipela.

"Mipela i kisim tok orait pinis long nesenel level na komisina em yet wantaim ol sinia ekseketiv opisa pinis olsem Kisic em rait hap," Mista Simp i tok moa olsem.

Hoffman Gulgarye i raitim