GAVANA bilong Wes Sepik Tony Wouwou i no wanbel long ol raskol pasin i kamap long Sepik. Em i tokaut olsem wanpela yangpela man long Wes Sepik ol i bin kilim long las wik Mande i nogut tru.

Ol i kilim dispela yangpela man Ernest Nataleo long Kostal Haiwe bilong Is Sepik Provins long ples Banak. Dai bilong Ernest Nataleo i kamap bihainim sampela dai we bin kamap pinis long las yia yet bikos long ol raskol i holim ol lain long Inlen Sepik Haiwe na Sepik Kostal Haiwe.

Planti lain husat i kisim bagarap long dispela pasin em ol lain long Wes Sepik.

Ripot i tokaut olsem Ernest Nataleo em i gat 30 krismas na em i marit na i gat wanpela pikinini. Em i laik i go bek long ples bilong en long Yakamul, Aitape Distrik bihain long em i go stap sampela de long Wewak taim em i bungim dispela hevi na i lusim laip.

Bihain long wan aua ol i lusim Wewak taun, ol i kam kamap long ples Banak we ol raskol i redi long holim ol tasol draiva i no stopim kar taim em i lukim ol, em i spit na abrusim ol na i go. Ol raskol i belhat na sutim gan long kar na wanpela bulet i kisim Ernest Nataleo na kilim em stret.

Wes Sepik Gavana Wouwou i belhat long dispela pasin i kamap na i tok dispela pasin em i go egensim gutpela pasin na gutpela nem we Sepik i holim bihain long Gren Sif Sir Mihael Somare i dai.

“Dispela pasin em i no namba wan taim i kamap. I bin gat wankain samting i kamap long las yia we wanpela yangpela man long ples Malol long Wes Kos Aitape i lusim laip long Sepik Kostal Haiwe.

“Bilong wanem na yumi atekim yumi yet i go i kam taim yumi inap long sapotim yumi yet na kamapim gutpela ples Sepik?

“Yumi lainim wanem samting long bikpela lidaman bilong yumi Sir Michael na strongim gutpela wok bilong en?

“Sutim na kilim indai narapela Sepik man bihain long yumi planim Sir Michael em we bilong rispektim na onarim dai bilong Sir Michael?” Wes Sepik Gavana Wouwou i askim.

Gavana Wouwou i belhat tru taim em i tok nogat long dispela raskol pasin we i kamap. Em i singaut long ol pipel long Banak long tokaut long ol dispela raskol na lo bai mekimsave long ol.

Em i salim bikpela sori bilong en i go long ol famili bilong Ernest Nataleo.