MOA long 40 COVID-19 sikmanmeri i slip long Pot Mosbi Jeneral Haus Sik (PMGH) na 120 helt wokmanmeri long PMGH i kisim COVID-19 na i stap long aisolesen.

Planti bilong ol dispela wokmanmeri i save wok insait long imejensi dipatmen bilong PMGH.

 PMGH i gat wanpela wod bilong COVID-19 sikmanmeri. Dispela wod i gat 18 bet we olgeta yet i pulap na nau ol i givim narapela wod gen long ol COVID-19 sikmanmeri na dispela wod tu i pulap.

PMGH i nau bungim planti salens we ol i sot tru long wokmanmeri, spes bilong bet na ol samting bilong lojistik.

Wanpela seksen bilong imejensi dipatmen i save pulap wantaim ol COVID-19 sikmanmeri husat i wetim ol wokmanmeri long karim ol i go long wod bilong COVID-19.

Sif Ekseketiv Opisa bilong PMGH Dokta Molumi i tok namba bilong ol sikmanmeri na pikinini long imejensi i wok long i go antap tru long wan wan de bikos Gerehu Haus sik tu i pas na olgeta sikmanmeri na pikinini i go long PMGH tasol.

“Mipela i stap long wanpela kain situesen we, planti sikmanmeri na pikinini husat i gat COVID-19 na husat i no gat COVID-19 wantaim i kam pulap long haus sik na i wetim ol liklik namba bilong ol helt wokmanmeri husat i wokim planti wok na i bun slek pinis, long helpim ol,” Dokta Molumi i tok.

“Namba wan samting we pablik i mas mekim long helpim PMGH na helt sistem bilong Papua Niugini long sanap strong yet em long daunim pasin bilong karim COVID-19 i go i kam. Plis harim tok na bihainim nupela pasin. Werim pes mask, wasim han na stap longwe long narapela. Na plis stap long haus na noken i go long ol bung ples.”

Dokta Paki Molumi i tok long mun Janueri bilong 2021 ol i bin mekim 123 tes bilong COVID-19 long PMGH long ol lain husat i soim sain bilong COVID-19 tasol i no gat wanpela bilong ol i kisim COVID-19.

Tasol em i tok long mun Februeri em i narapela stori. Ol i mekim 380 tes bilong ol lain husat i soim sain bilong COVID-19 na ol i painim aut olsem 39 i kisim COVID-19. Dispela em olsem 10 pesen bilong 380 i gat COVID-19.

Nau long dispela taim, Dokta Paki Molumi i tok 70 pesen bilong ol test ol i bungim i save gat COVID-19. Em i tok, long 10-pela sikmanmeri husat i soim sain bilong COVID-19 na kisim test, risal i save soim olsem 7-pela i save gat COVID-19.

Rebecca Negere i raitim,