KAUNTING bilong Kandep Open ileksen long Kundiawa, Simbu Provins i pinis long Fraide Mas 19, 2021.

Dispela kaunting I bin kamap bihain long kot i bin painim olsem i gat asua long kaunting pastaim long 2017.

Bihainim oda bilong kot ol opisal bai i bringim ol risal i go bek long kot na kot yet bai i tokaut long en bihain long em i skelim olgeta ripot em i kisim.

Dispela kaunting i bin kamap long Kundiawa bihain long kot i luksave olsem em i no seif long go het long kaunting long Wabag, hetkwata bilong Enga Provins we Kandep Open Ilektoret i stap long en.

Sif Suprintenden Joseph T. Tondop i tok tenkyu long olgeta lain husat i karimaut dispela wok long Kundiawa.

Em i tok tenkyu long ol Ritening Opisa na tok olsem, ol i bin wok strong tru bihainim gut lo maski i bin i gat bikpela presa long ol i mekim wok bilong kaunting.

Tupela memba husat i pait long sia bilong Kandep Open, Alfred Manase na Don P. Polye tu i kisim luksave bilong Suprintenden Tondop. Em i tok tupela i bin soim pasin bilong rispek long ol institusen bilong stet na larim ol i mekim wok bilong ol.

Suprintenden Tondop i tok tenkyu tu long ol pipel bilong Simbu long larim ol i mekim dispela wok long provins bilong ol.

Moa yet em i tok tenkyu long ol pipel bilong Kandep na Enga Provins long rispektim namel graun long Kundiawa, Simbu Provins long larim wok bilong kaunting i kamap isi na i no gat hevi i kamap.

Suprintenden Tondop i no lus tingting tu long ol polis opisa bilong em wantaim ol soldia bilong PNG Difens Fos na olgeta wokmanmeri husat i mekim dispela wok i kamap.

“Yupela i bin sanap strong na mekim ples i stap gut na isi long wok bilong kaunting i go het gut,” Suprintenden Tondop i tokim ol.

Ol i kauntim gen ol vot bilong Kandep Open bilong 2017 ileksen bihain long kot i painim olsem sampela asua i bin kamap na Alfred Manase i kamap memba.