MASKI bikpela san i hat long las wik Trinde moning, moa long 1,000 manmeri, ol sumatin, pablik seven i mas o wokabaut long soim respektim bilong ol long dai bilong Gren Sif Sir Michael Palangat Somare.

Ol i stat wokabaut long Kokopo Sekenderi skul bihainim Williams rot i go tanim long Kokopo Vunamami Eben LLG  na i kam long Ralum So Graun.

Dispela mas em ENB Haus krai komiti aninit long ENB provinsel edministresen i hostim. Ol  polis, Koreksenel Sevis opisa, gavman woklain, na sampela ol sumatin long Kokopo distrik na arapela manmeri i werim blakpla klos na rapim skin bilong ol wantaim graun long soim sori na wari bilong ol long Gren Sif Sir Michael Thomas Palangat Somare.

Ol i karim ol piksa i soim Sir Michael Somare na wokabaut isi wantaim wari bihainim Williams rot na bihain i go bung long Ralum so graun. Plak bilong PNG na Is Nu Briten i go daun long hap mak long soim rispek long papa Sir Michael Thomas Somare i lusim laip bilong em.

Long so graun  provinsel edministreta Wilson Matava, bipo memba bilong Gazel Sinai Brown na Jacob Simet i stap long toktok long laip bilong Sir Michael Somare.

Tripela lidaman i tok olsem Sir Michael Somare em i pait strong long kisim independens long han bilong Australia long bringim gutpela sindaun long pipel bilong dispela kantri.

Provinsel Edministreta Wilson Matana i tok olsem dispela em i bikpela de long mipela na pipel bilong Papua Niugini long tok sori, wari na fewelim Gren Sif Sir Michael Somare.

Matava i tok em i makim maus bilong Gavana  Nakikus Konga na foapela memba bilong palamen husat i no stap long mipela i givm las rispek bilong mipela long makim pipel bilong Is Nu Briten long papa bilong kantri.

Em i salim tu tok sori i go long Ledi Veronica, ol pikinini na ol bubu bilong Michael Somare na tu pipel bilong Is Sepik provins

Dispela mas i soim pipel bilong ENB  i bung wantaim ol arapela provins long kantri long wari and krai long man husat i go pas long mekim dispela kantri i kamap independen, Matava i tok.

Em I tok tu olsem long dispela taim no bin gat planti savemanmeri tasol Sir Michael i wok strong long kisim independens long kirapim gutpela sindaun bilong pipel bilong dispela kantri.

Matava i tok Sir Michael i kisim kainkain tok salens long lidasip bilong em tasol em i no pret, em i sanap strong na em i wok hat long bungim kainkain kalsa i kam bung wantaim na em i kisim independens.

Matava i tok em i sori long wanpela pikinini bilong Is Nu Briten yet i lus pinis bikos Gren Sif Sir Michael, mama i karim em long Rabaul na em i wanpela man Tolai.

Em i tok tenkyu long ENB long ol  komiti long redim dispela haus krai long rispektim gutpela wok  Gren Sif Sir Michael Somare  i mekim long kism independens na tude mipela i kisim gutpela sindaun long ol provins na ol komyuniti bilong mipela.