Pastaim Praim Minista na Gavana bilong Westen Hailans provins Paias Wingti i salensim ol PNG politisian olsem sapos ol i rispektim tru Gren Sif Sir Michael Somare, ol i mas rispektim konstitusen em i bin kamapim.

Gavana Wingti husat i bin stap olsem Praim Minista bilong Papua Niugini inap tupela tem i tok Sir Michael olgeta taim i bin rispektim tripela (3) han bilong gavman long operet ol yet na tude ol lida mas mekim wan kain olsem em i bin mekim.

Wingti i tok ol memba bilong Palamen mas rispektim olgeta gavman institusen bilong kantri  na no ken traim long kisim ples o mekim disisen bilong ol wan wan han bilong gavman.

Em i tok konstitusen bilong kantri em i mas olsem faudasen bilong Papua Niugini. Somare  em i smat olsem na em bungim ol save man bilong PNG husati bin laik wok bung wantaim na ol i bin kamapim dispela mama lo bilong kantri.

“Em givim praioriti long dispela na dispela em we faundesen bilong kantri i sindaun antap long en. Nau yumi rispektim dispela bikpela man husat mi kolim sif olgeta taim na yumi tingting long ol wok em I wokim long kantri.

“Konstitusen em i klia tru olsem, Ekseketiv han bilong gavman, ol kot na Nesenel Palamen, wanem pawa bilong ol, wanem pansen? Em i tok klia long ol wok bilong konstitusen.

“Somare i mekim klia olsem, ekseketiv i no ken traim long stopim kot na i no ken kisim wok bilong palamen. Ol i gat pawa bilong ol yet.

Wingti i tok nau taim yumi sanap long peim las rispek long sif, yumi mas tingting long wanem samting yumi ken bihainim long taim bihain.

“Yumi honarim em long Praim Minista bilong kantri i mas save olsem em i no ken kisim wok bilong ol kot, Praim Minista bilong kantri i no ken kisim wok bilong pablik prosikuta wantaim wok bilong Ombusmen komisen.

Em i man bilong wokim polisi, em i no sapos long kisim ples o wok bilong ol. Ol operesen isu bilong konstitusen Somare i bildim pinis,” Gavana Wingti i tok.

Joseph Dawai i raitim