IS Sepik Gavana Allan Bird i tok em i leit nau long komplen long wanem COVID-19 i stap pinis long Papua Niugini.

Em i tok Pot Mosbi Jenerel Haus Sik na olgeta praivet haus sik i pulap pinis long ol COVID-19 sikmanmeri. I nogat moa spes. Ol pipel i slip long plua na kisim win (oxygen).

Ol i toktok nau long opim Akwatik Senta long Pot Mosbi olsem imejensi ples bilong tritim ol COVID-19 sikmanmeri.

Long Pot Mosbi Jenerel haus sik tu 235 medikol wokmanmeri i gat COVID-19 sik na ol i stap long aisolesen. Em i min olsem ol i no inap long wok.

Stat long Fraide i kam inap nau moa long 1,000 nupela keis bilong COVID-19 i kamap. Is Sepik Provins i gat 5-pela medikol wok manmeri wantaim COVID-19.

Insait long tripela de tasol mipela long Is Sepik i rekotim 20 nupela keis long taim bilong Stet Fiunerel bilong Gren Sif Sir Michael. Em bikpela namba tru bilong mipela stat long taim sik ya i kam.

Is Sepik Provinsel Helt Atoriti i wanbel olsem ol medikol helt woka i mas kisim veksin tasol em bai i bihainim laik bilong ol. Planti medikol wok manmeri bilong mipela i pret long go long wok.

Ol 5-pela medikol wokmanmeri i kisim COVID-19 bihain long ol i wok long wanpela sikman tasol. Em i no liklik samting.

Long kisim veksin, em i laik bilong yu. Tasol yu ken les sapos yu gat gutpela solusen long stretim dispela sik na hevi em I bringim wantaim em.