Gavman na Opis bilong Kontrola bilong Papua Niugini COVID-19 Pandemik i lustingting long klostu 975,000 disabel manmeri na pikinini insait long ol streteji ol i mekim long daunim COVID-19 long kantri.

Wanpela diasbel man nem bilong en Patrick Samar, i tok taim COVID-19 i kam long PNG long las yia yet, Opis bilong Kontrola i toksave long ol manmeri na pikinini long kantri long wasim han wantaim sop olgeta taim, kus i go insait long hanskru, no ken holim pes bilong ol, stap long haus, na stap 1.5 mita longwe long narapela long abrusim COVID-19. Tasol em i tok gavman i no tingim olsem ol disabel tu i stap insait long kantri.

“Olsem wanem bai manmeri o pikinini husat i nogat han i kus i go insait long hanskru o holim tisu na karamapim pes taim em i kus? Olsem wanem na ai pas bai lukim narapela na kaunim 1.5 mita na sanap longwe long en. Ol dispela lo we i kam long gavman na opis bilong Kontrola i soim olsem ol i no tingim mipela ol disabel. Ol i tingim ol yet long gutpela bodi bilong ol na ol i lusim mipela ol disabel long baksait,” Patrick Samar i tok.

Em i tok moa olsem wanpela yia i abrus pinis long pait bilong daunim COVID-19 long kantri na insait long dispela taim Gavman i no tingim ol disabel na senisim ol lo na oda bilong COVID-19 tu, nogat. Em i tok Gavman i no tingim tu olsem ol disabel i stap long mak nogut na helpim ol wantaim sampela mani i kam long rispon long COVID-19 o givim mani long ol institusen husat i save lukautim ol disabel, nogat.

“Gavman i save lustingting long mipela long edukesen, helt na nau em i lustingting long mipela long COVID-19 hevi tu,” Patrik Samar i tok.

Patrick Samar i krai taim em i mekim ol dispela toktok. Em i laikim olsem ol disisen na streteji gavman i mekim long gutpela bilong kantri, ol i mas tingtim em na ol arapela wantok bilong en tu na mekim.

Rebecca Negere i raitim