FOTI-TU kendidet i rejista pinis long resis long Pot Mosbi Not Wes Bai-Ileksen.

Dairekta bilong Institut bilong Nesenel Afeas, Paul Barker i tok dispela i soim open demokresi we pipel i fri long resis long ol ileksen tasol long wankain taim em i soim tu sampela hevi i hait aninit.

Barker i tok yes i gat ol gutpela lain i laik kamapim sampela gutpela senis long ol komyuniti bilong ol taim ol i kamap memba bilong palamen tasol dispela bikpela namba i soim tu sampela samting i no stret.

Insait long ol ikonomi ol bisnis i ranim ikonomi bilong dispela kantri na ol i kamapim ol wok na helpim long kirapim welt. Ol tu i baim takis na bringim kainkain ol guds na sevis we ol komyuniti i nidim. Pasin bilong ol long wok em i ran gut tru bihainim pasin bilong wok resis.

Long ol pablik sevis ol profesenel wokmanmeri olsem ol nes, dokta, tisa, enjinia, akaunten na ol arapela i mekim wok bilong givim sevis long ol pipel. Ol i mekim ol dispela wok wantaim helpim bilong ol sios na ol NGO.

Long wankain taim dispela ol profesenel wokmanmeri na ol sios na NGO i putim ai nay au tu long hau wok bilong gavman i ran na sampela taim i save tokaut sapos samting i no go stret.

Ol politisen tu i gat bikpela wok olsem man o meri ol pipel i makim long mekim wok long nesenel, provinsal na lokal level.

Tasol nau long dispela taim wok bilong politisen i paul. Ol politisen i paul long pasin bilong kontrolim bikpela mani long provinsal na distrik level aninit long Service Improvement Program (SIP) sistem bilong provins na distrik.

Ol i tromoi nabaut dispela ol mani na i no bihainim rot stret na putim mani long wok stret. Planti ol politisen i save yusim pawa bilong ol na muvim ol mani i go i kam.

Dispela kain pasin i ken kamapim planti moa hevi taim ol i surikim mani bilong wanpela wok i go long narapela samting. Papua Niugini i sot tru long mani risos na kain pasin em i no stret, Mista Barker i tok.

“Kantri i inap stap long sampela gutpela mak long divelopmen bilong en tasol i no gat strongpela tok bilong stiaim ol wok bilong praivet sekta,” Mista Barker i tok.