PRAIM Minista James Marape i askim ol pipel long rispektim Jisas bilong Gren Sif Sir Michael, strongim kalsa na lukautim ol envairomen bilong yumi.

Em i tok tu yumi mas lukautim ol lapun bilong yumi na ol lain i stap klostu long yumi, holim konstitusen bilong yumi antap tru na oltaim putim kantri PNG i go pas na i no ol traib yumi kam long en.

Em i tok long dispela rot ol pipel bai i ken givim ona long Gret Gran Sif bilong yumi husat i dai na lusim yumi i go pinis.

Em i mekim dispela toktok long taim bilong stet Misa bilong indai bilong Gren Sif Sir Michael Thomas Somare long Fraide 12 Mas, 2021 long Sir Hubert Murray Stedium long Pot Mosbi.

“Taim yumi stap long sori bilong dispela bikpela Sif bilong yumi, na yumi tingim ol mak em i putim pinis yumi mas tingim tu, yumi yet long dispela taim bai i mekim wanem long strongim kantri bilong yumi,” Mista Marape i tok.

“Yumi no ken tok mi yangpela tumas long mekim wanpela samting long helpim kantri. Gren Sif Sir Michael i bin i gat 39 krismas long 1975na em i kisim independens bilong yumi, Papua Niugini.

“Yumi no ken ting olsem yumi no skul  o no gat gutpela save long mekim wok, long wanem, Gren Sif Sir Michael i no bin gat yunivesiti digri taim em i kamap Praim Minista.

“Yumi no ken tok no gat risos long mekim wok na dispela i no ken daunim hop na driman bilong yumi long kamapim gutpela Papua Niugini,” em i tok.

Long dispela taim Praim Minista Marape i mekim tok promis tu olsem em bai i wok strong long helpim kantri bilong yumi.

Em i sanap strong long pusim ikonomik independens bilong Papua Niugini.

Em i tok, “Papua Niugini i no inap selebretim politikel independens bilong em sapos ol pipel i stap trangu yet.”

Praim Minista Marape i bin luksave tu long bikpela wok Ledi Veronica i bin mekim long helpim Gren Sif Sir Michael mekim wok bilong em olsem Praim Minista long ol taim em i stap long gavman na taim em i stap ausait long gavman.

Long dispela taim tu Praim Minista Marape i luksave tu long ol pikinini; Sana, Arthur, Bertha, Dulciana na Michael Jr long ol sakfrais ol i mekim long larim papa bilong ol i mekim wok politik bilong kantri.

Taim em i stap laip Gren Sif Sir Michael i bin stap wanpela gutpela katolik na i save soim pasin rispek long olgeta lain pipel em i bung wantaim. Wantaim bilip bilong em, Gren Sif Sir Michael i bin winim planti hevi na bungim kantri na moa long 800 traib wantaim.

Maski Praim Minista James Marape i bin traim long helpim em i go kisim medikol helpim long ovasis, Gren Sif Sir Michael i no bin tok yes na em i dai long kantri bilong em yet.