SIF Suprintenden Joseph Tondop husat i bin go pas long opresen bilong kauntim ol vot gen bilong Kandep Open long Kundiawa i tok em i bilip ol polis i ken givim seif na isi ileksen we no gat birua i ken kamap.

Em i mekim dispela tok bihain long kaunting bilong ol vot bilong Kandep Open long Kundiawa i bin pinis gut na nogat birua i kamap.

Em i tok ol ileksen i ken kamap gut sapos olgeta pati i luksave na rispektim lo, yusim tingting na wok bung wantaim. Dispela pasin i bin kamap long Kundiawa we no gat hevi i bin kamap.

Suprintenden Tondop i tok jenerel ileksen long 2022 i wok long kam klostu pinis na em bai i gutpela sapos PNG Ilektorel Komisin na Polis i stat mekim plen bilong dispela ileksen nau yet.

Em i tok 2022 jenerel ileksen bai bikpela wok stret na ol i no ken ting em liklik samting na wet long mekim plen long las minit.

“Mipela olgeta i harim pinis olsem dispela ileksen bai i no gutpela, na sans bilong planti birua bai i kamap em i stap, tasol yumi plen gut long dispela ol samting nau yet, menesim gut dispela wok na lainim long ol wok i go pinis na ekspiriens bilong yumi long kain taim olsem.

“Mi bilip mipela i ken bringim gutpela ileksen long 2022,” Suprintenden Tondop i tok.