WANPELA bikpela opisal Hen-ova na Tek-ova seremoni i bin kamap namel long olpela Stesin Komanda na Semina Inspekta Mista Ben Kua wantaim nupela Sinia Inspekta Titus Bayagau long las wik Fraide long Hohola Polis Stesin long Nesenel Kapital Distrik.

Dispela em bikpela histori seremoni bilong Hohola Polis Stesin bikos i no gat wanpela i bin stap longpela yia wankain olsem Ben Kua husat i stap inap 8-pela yia olgeta na nau em i laik muv fowat long nupela wok bilong em long Boroko Polis Stesin.

Olpela Sinia Inspekta Mista Ben Kua i tok tenkyu na amamas long wok bung wantaim ol Hohola komyuniti  maski planti salens  i kamap long dispela wok polis tasol ol i save holim han wantaim long stretim olgeta hevi bilong polis.

“Long las 8-pela yia planti senis i bin kamap insait long Hohola Stesin olsem; nupela  ol bilding i kamap, banis bilong polis stesin na tu olgeta polis opisa i wokim gutpela wok bilong ol taim ol sevim Lo na Oda bilong kantri,” Mista Kua i tok.

Em i tok bikpela tenkyu long ol Hohola Komyuniti husat i bin sanap wantaim ol long taim no gut na gutpela taim long senisim pes bilong Hohola Stesin.

“Mipela laikim ol komyuniti i mas wok bung wantaim ol polis na ol polis tu i mas wok aninit long lo bilong gavman bikos ol i wankain olsem mipela,” em i tok.

Em i askim olgeta pipel i mas helpim ol liklik namba polis opisa husat i wok nau long stesin na ol bai sapotim olgeta komyuniti long stretim ol hevi.

“Mi bai no inap lusim dispela Hohola Polis stesin bikos em ples bilong mi we planti hanmak bilong i stap long en olsem na bai mi go kam lukim long olgeta taim,” Kua i tok.

Nupela Sinia Inspekta Mista Titus Bayagau husat i bin kisim ples bilong Ben Kua i tok bikpela tenkyu long Mista Kua na apim nem bilong em bikos em i bin wokim bikpela wok long Hohola Stesin na senisim pes bilong stesin.

“Mi laik tok tenkyu tu long olgeta hatwok polis opisa na ol komyuniti lida bilong Hohola  husat i save wok bung wantaim Mista Kua long senisim stesin kamap namba wan,” Mista Bayagau i tok.

“Mi kam olsem nupela Sinia Inspekta bilong Hohola stesin olsem na bai mi wok strong long save long olgeta komyuniti lida bilong Hohola na go het wantaim ol hap wok we Mista Kua i lusim na go,” em i tok.

Ol  pipel bilong Hohola komyuniti i bin kamap long lukim dispela Hen-ova na Tek-ova seremoni i bin kamap namel long olpela na nupela Polis Sinia Inspekta bilong Hohola Polis Stesin na tok gud lak long wok bilong tupela bihain taim.

Jacklyn Kimala i raitim